2011馬交遊 ~ 第2-3餐@ 大利來記 + 安東尼奧 (Yahoo copy版)

day 1在奧羅拉食完超飽午餐, 之後搭的去威尼斯人逛賭場, 商店, 坐貢多拉, 之後又再次出發去食食食! 前往舊城區中間, 途中見到目標之一的喜蓮咖啡...
不過最後都係決定留肚俾3:15pm出爐的大利來記豬扒包!!




計好時間+專程搭的士來, 終於趕到大利豬扒包出爐啦!! 
不過店方都幾大牌, 其他食物可以點, 豬扒包寧寧舍舍要自己去買~~
新鮮出爐的豬扒包, 現售MOP 20/個~~



買了一個與友人分享~~ 豬扒好味, 個包又脆且帶咬口, 好好食!! 
不過友人真係太渣, 食左1/3都唔知有冇, 2人連一個包都食唔哂....



又要了熱奶茶 (MOP 10), 原來奶同茶係分開上, 另設茶隔俾食客使用~~



將超熱的茶倒進杯中... 好好玩~~~ 



成品奶茶~ 奶味重了少少, 但風味都唔錯, 值得一試呢! 
順帶一提, 現時威尼斯人內都有大利來記, 不過梗係街邊風味o岩feel啦!



之後逛了逛舊城+官也小食街, 又去了黑沙灘後, 又再度折返舊城~~
太心急了, 2人六點都未到, 就提早抵達晚餐目標---安東尼奧Antonio



門外有支特色大酒樽~~ 另一邊是眾多的certificates~ 好猛料!



早了7分鐘去到, 小店未夠鐘營業, 與友人要在外面坐著/閒逛, 準時六點才開門~~



終於有得入坐啦~~ 店內環境是傳統的葡式風味, 好靚好得人鍾意!! 



開心留影先~~~ 雖然我覺得個角度麻麻, 不過影我唔肥就得啦~~ 



小店不設免費水, 要了一支bottle water (MOP 40)~ 其實俾$$$都冇所謂, 但我地想要暖水, 侍者堅持依支Room temp的水係暖架啦, 唔肯再返煮.. 算啦~~



前菜橄欖, 幾好食, 友人唔食關係, 成份俾我清哂!



麵包籃, 幾好食但唔太熱, 而如需re-fill要另收費架!



深知友人食量有限, 2個女仔只點了一份頭盤, 一份主菜, 加一份甜品~
頭盤是炸馬介休球 (MOP 120), 一客共有5件



做得好好食, 外脆內鬆滑, 又不過咸, 不過最後都食剩了一隻...



主菜一早諗定要著名葡式焗鴨飯 (MOP 190)~!! 



落單時外藉女侍警告我地此飯只是一人份量, 上檯時見到大大份又香噴噴的葡式焗鴨飯, 我心諗: 妳一個人食得哂? 唔係o卦?? 
鴨飯外層有些微飯焦, 焗得超香, 並蓋著勁香口的煙肉及風味葡式腊腸~~ 由於友人胃消化麻麻, 飯焦位全落我肚, 超滿足!! 



另飯中芯較濕潤, 又有肉汁豐富的鴨肉絲, 真係好食到唔識形容!! 
結果不好米飯的我, 出盡全力食了半兜... 清哂!!! 為自己鼓掌~~~ 



食完個焗飯真係超飽.. 友人又講到明幫唔到手.. 但冇理由唔食甜品架? 正苦惱揀雞蛋布甸 (係signature甜品, 但睇蝗蟲同事食評似乎唔太得?), 抑或木槺布甸之際, 鬼佬侍應走來叫我點後者, 好啦, 信佢推介!
而其實眾多葡式甜品中, 個人最鍾意都係木槺布甸 (MOP 60), 而這裡的出品十分香軟滑溜, 好好味呀~~  不過如果餅乾碎再多少少, 就更完美啦!!



最後想講樓上洗手間亦很骨致~ 雖然侍應有點串, 但環境食物俱佳, really like this shop!! 希望有機會可以一大班人來掃佢餐牌!! 
就係咁, day 1其餘的2餐, 都比米芝蓮一星的Aurora更加好味~~ 而day 2都會繼續食好野, 請留意收看~~ 

沒有留言:

發佈留言