老公生日快樂 @ Cafe TOO

BB已經足月 (滿了37週), 隨時可能出世, 依家大肚媽媽逢週五都要去做檢查~

9/30的上午做完產檢, 姑娘話BB好正常, 前一晚先食完唔少甜品/雪糕的媽媽血糖血壓都好理想, 嘻嘻
於是, 夜晚可以放心/放肆同老公勁食慶祝了!! 

本年度第N次黎Island Shangri-La食飯啦! 因為又有生日半價優惠, hoho~ 

來一張合照~~ 可惜機仔唔太夠wide, 影唔到阿B! 


灘萬龍蝦吧Petrus (re-visited), 今次來到7/F的Cafe TOO食buffet! 
先經過長長的「酒」廊, 就會進入buffet區同sitting area~~



抵達之時6:30pm都未到, 當時餐廳得好少人, 氣氛清靜好舒適!


用餐環境都唔錯, 係後來人多有點嘈~  我地坐得都幾近buffet檯, 好方便去拎野食! 

 等我慢慢介紹下場內有咩野食啦!! 

由入口開始, 首先係海鮮區, 有草蝦、青口、波士頓龍蝦, 同蟹~


超吸引的大大隻波士頓龍蝦..... 不過我冇自已拎, 只係痴老公食了少少~


之後轉角有刺身區, 經老公試食三文魚夠新鮮, 我都拎了一碟來食~


更多的日式冷盤小食~ 後面仲有即叫即製手卷添, 同老公分別食了一個!


芝士、沙律及冷盤區, 選擇又係非常豐富!


除了巴馬火腿配蜜瓜/哈蜜瓜, 水牛芝士蕃茄, 及雜果沙律等, 這裡又有泰式沙律及生菜包等~


再轉角有埋滬式冷盤, 而且質素唔錯, 中間的燻蛋同大蝦麻醬冷麵都好正!


睇完冷盤, 又望下熱盤有咩食, 首先是點心同中湯區~~

老公試了中湯唔錯, 據知7:30pm會有老火燉湯出爐添!


中式熱盤, 影的角度唔好, 囊括唔到好多款式, 其實種類頗多又幾有水準的!


質素唔錯的明爐燒味, 後方是西湯及更多西式熱盤, 大多都幾好食!


即點即切的燒牛肉, 後來都有試質素唔錯, 配菜的薯角仲超級香脆!


再向前行有即煮粉麵檔, 負責人仲特別表演拉麵添!!


粉麵檔另一邊, 可見配料同食物選擇超豐富~~~


這是當晚極受歡迎的日式鐵板燒檯, 師傅會不斷製造帶子鵝肝燒, 後來好多人排隊架!!


最後方又有印度咖哩美食, 影時食物未擺哂出黎, 選擇都幾多!


最後當然少不了甜品區啦!! 繽紛吸引的甜品區位於餐廳中間, 設計好聰明丫~~ 


超多口味選擇的Haagen Dazs雪糕~~
加了配料的關係, 我覺得佢比專門店的出品仲要好食, 真係超正!! 


雪糕可點配唔同的toppings, 以及醬汁, 好開心丫!!! 

  另一邊超多選擇的西式甜點~ 款式太多, 是晚只能揀部份來試咋!


更多的甜點選擇... 係咪好誇張? 而且甜點fill得超快, 絕對唔駛擔心食完就無!


這是我最鍾意的一款西式甜餅~ 朱古力味又濃, 餅身又夠moist, 好味!! 


生果的質素都好好~~
尤其蜜瓜清甜無比, 簡直入口即融, 比沙律部的更高質精彩, 老公拎佢黎配巴馬火腿添呀! 



場內又有即焗souffle, 同埋即製pancake, 可惜冇左即焗心太軟.....


最後影埋中式的甜點, 因為太靚是晚都幫襯了幾款~~


因我掛住影相 (而要影的又太多!!), 再次坐底之時老公已經食緊第2碟刺身~~

據知刺身質素頗理想, 後來我都去拎了一轉三文魚!


溏心燻蛋大大的吸引了, 馬上拎了一隻, yummy! 底下有馬蘭頭, 襯得燻蛋更美味~ 
後面的大蝦麻醬冷麵又係好清新醒胃, 推介!!


老公唔俾我拎龍蝦, 不過都肯願意將拎來的龍蝦一齊分享~~
依碟有特別多鉗, 啖啖肉好鮮甜, 我食了一隻好滿足了 


三文魚夠健康, 所以又拎了一碟, 加上熟壽司卷, 同日式玉子冷盤~~



老公突然拎來一碟生果, 並發現原來蜜瓜好食得非常緊要, 之後連續幫襯左好多!! 


又是老公的燒牛肉 (西式熱盤), 質素好好喎, 我尤其鍾意多汁的配菜燒蘑菇!! 


我就拎了西式沙律--- caesar salad只一般, 水牛芝士蕃茄好味, 巴馬火腿都好正, 配的蜜瓜/哈蜜瓜夠甜 (當然水果區的更正!)~~

同場又拎了即製軟殼蟹手卷, 新鮮滋味唔錯, 如軟殼蟹再熱D仲好!

老公參考了我的意見, 真的去拎巴馬火腿配原片蜜瓜~ 甜到呢!!!   並加多個軟殼蟹牛油果手卷~

好奇之下又試了泰式生菜包 (麻麻), 泰式牛肉沙律 (好食), 及少量燒味~
燒味質素唔錯, 乳豬脆卜卜, 油雞又好嫩!


想留肚俾燉湯, 本來都唔打算飲西湯, 但見芝士多士太正, 又拎了半碗洋蔥湯~
一如預期, 芝士多士是主角, 是重點!!


之後老公又拎了小籠包及其他中式熱盤~ 原來小籠包好鮮甜多汁, 好味喎!! 


之後又拎了更多隻小籠包~~~


我的中西兼會熱盤~~ 脆炸魚柳, 香草焗三文魚、燒牛肉等, 全部都頗有質素呢!! 


老公又再encore小籠包, 連同其他點心~ 我覺得蝦餃有點遜色, 叉燒包都還好


見咁多人幫襯, 我又出去拎了兩碟帶子鵝肝鐵板燒
帶子鮮美肉厚, 真係幾正, 不過鵝肝口味就太油了, 排完一轉都夠了~


食到咁上下, 老公已在叫飽... 於是二人出去拎雪糕解滯!!
同時, 一早與酒店夾好, 拎定火柴同蠟燭, 為老公營造驚喜~~ 


老公, 再一次生日快樂丫~~ 


一家三口來一張合照~~ 


吹完蠟燭, 許完願, 今次唔係切+食蛋糕, 而係筆+食雪糕~ 好好味道丫!!! 


依款芋泥山楂都好食啊!!! 


7:30pm, 餐廳敲鑼又打鼓, 原來燉湯出爐了!!! 老公即拎了兩盅返來~~


係烏雞煲的靚湯, 好滋潤好正, 我大大盅全部飲哂!!!


飲完中式的燉湯, 突然好想食中式包點、糖水, 即出去拎了一轉~

三款糖水中, 較好是芝麻糊配杏仁豆腐, 其餘兩款普通; 蒸包就好好食!


奶黃包爆哂餡架, 又有濃濃蛋黃香; 後而的蓮蓉包都香甜細滑~ 


再拎更多生果甜品~ 除了蜜瓜, 後方的朱古餅都好正!!



Cafe TOO的buffet真係既豐富又好味, 以我+阿B的細水長流好胃口, 應該可以磨幾粒鐘, 將所有款式試均架
不過老公第2日要早起跑10K, 於是唯有快快手食多轉甜品+雪糕, 就埋單喇~

要講最後的麵包布丁好味道, 配上custard醬好正呀! 


最後解滯的earl grey同mint tea~~


夜晚8時多的lift lobby, 好靚好有氣氛呀~~ 



離開之時金鐘滂沱大雨, 不過返到元朗又冇乜雨落, 真係感恩丫!

開心好滿足的一晚, 最緊要壽星公生日快樂, 來年身體健康, 搵多D錢, 好好照顧我同BB, haha~~ 

沒有留言:

發佈留言