愉快的聖誕新年假就咁結束, 今日又要一直返工至農曆新年再有假期了...
唯有回味一下假期的片段叉叉電, 首先是12/26 Boxing day, Charlotte同Matthew的lunch gathering @ 尖咀諾士佛臺 T2 Teppanyaki & Tapas Bar
唯有回味一下假期的片段叉叉電, 首先是12/26 Boxing day, Charlotte同Matthew的lunch gathering @ 尖咀諾士佛臺 T2 Teppanyaki & Tapas Bar
酒BAR
我地一行四大兩小, 坐靠窗的位置, 採光一流, 景觀開揚, 感覺好好呀!!
然而當日Charlotte由港鐵站見面冇耐, 就喊到好傷心, 簡直係梨花帶淚!!
個樣真係好淒涼架......
哭崩長城............
我見猶憐.......!!!
超搞笑係Matthew見到Charlotte咁傷心, 即show出一幅著緊關心樣!!
Matthew「媽媽咪再影啦, 妳阻住我關注Charlotte呀!!」
Matthew「Charlotte, 其實妳可以考慮借我個膊頭喊架~~~~」
經過Matthew的安慰, 加上媽媽餵糊仔 (原來係肚餓了!!), Charlotte心情終於靚返
見到Charlotte無事, Matthew都開心返哂, 笑到香蕉咁眼了~~~~
傻瓜!! 開心都唔好聞pepper呀, 會打哈躉架!!
好野, BB們平靜落黎, 大人都可以開餐了!!
首先是麵包籃, 質素正常, 芝麻個款帶有甜味, Matthew仔好like~~~
大家都是點了3-course自選午餐, 頭盤有4款選擇, 媽媽揀了蕃茄芝士沙律
Mozzarella質素差d, 不過配合清甜蕃茄片, 加上意式黑醋、橄欖油及火箭菜調味, 都唔錯
杏仁同雅倫姨姨都揀了溫室青瓜香芒沙律, 睇落幾清新吸引, 不過我唔like青瓜呢
打波遲來的爸B點了煙三文魚沙律, 賣相好靚, 沙律菜也經調味, 清而不寡, 唔錯架
之後是每位精選餐湯, 當日為南瓜湯, 味道香甜天然討好, 很讚呢!
搞到為食Matthew豬, 在吃飽粥後也來分了幾啖~~~
之後是四款不同的主菜, 我地全部一齊share
這是美國安格斯肉眼厚燒配黑松露欖油 ($138), 肉質真係好靚好滑無根, 正!!
同上的烤薯都香口美味, 燒洋蔥同雜菜亦很清甜, 有驚喜呀
仲有銀鱈魚伴大蜆配洋蔥汁 ($138), presentation好靚又特別, 魚皮煎至香脆的鱈魚固之然好食, 大蜆亦相當有鮮味, 個汁又微帶酒香, 好吸引架
芥末蜜燒燒羊架 ($108) 份量頗足, 香嫩羊架外層是香口麵包槺, 再加上香甜蜜糖芥末汁, 當然又是美味!
最後點了鴨胸肉醬牛肝菌燴意大利飯 ($108) 就比較失威, 比較咸之餘, 鴨香不夠突出
餐後有咖啡/茶或甜品, 老公當然揀咖啡, 原來連Capuccino都有得揀, 幾正喎!
媽媽唔駛講梗係揀甜品, 係橙香mousse, 果味甜味輕柔, 亮點是面層的crumble碎以及墊底的魔芋粒, 令口感變得豐富!
最後因為有email invitation關係, 今餐仲有8折, 折後每人只是$111, 好抵食啊!!
如果下次再來, 或者就是吃鐵板燒了~~~
最後, 附上爸B大機靚相, 先係Charlotte同契媽~~~
Matthew收汽球, 開心!!! (餐廳服務非常唔錯, o係度再次一讚~~~
)
坐得耐唔耐煩樣~~~~
有taste!! 識揀最好味的肉眼黎進攻~~~~
差少少咋!!!
「唉, 最後都係食唔到.............」
轉個頭, Matthew就有新野食-----豬手... 好美味咁喎~~~
「咦, 今日好似係Boxing day呵? 等我打下boxing先~~~」
「打到有D餓, 媽媽快D俾野我食丫~~~」
為食豬全紀錄~~~
最後仲有2張係Charlotte的~~~~
其實除了12/26的Boxing day lunch, Charlotte同Matthew大除夕都有見面食飯! 遲d再記啦~~
留言
發佈留言