是日被安排就坐冷氣開放的店內, 其實夜晚來吃 (開心小叙夜晚唔開) 坐店外都幾風涼水冷又有情調架!
要讚小店的食物選擇好清新吸引, 而且質素良好定價又唔貴喎!
首先係凱撒沙律 ($42), 成品爽脆清新, 加上適量沙律醬同片片芝士又夠滋味, 在炎炎夏日超o岩胃口; 我地又加了$15配美式香草扒蝦, 都幾味鮮肉爽喎!
媽媽超愛Egg Benedicts, 見有班尼迪蛋配煙火腿、英式鬆餅、荷蘭汁及田園沙律 ($52), 即點!
成品都好流心喎, 蛋汁加上荷蘭汁再襯以金門火腿同好味的鬆餅, 太幸福啦~~~
另一款挪威煙三文魚多士配炒蛋及鮮蛋子忌廉汁 ($48) 都唔錯, 份炒蛋有10級嫩滑, 襯以鮮美的煙三文魚同脆多士, 又係好美味呀!!
我只嫌多士少左D, 多返2件就perfect啦~~
最後係意大利巴馬風乾腿配法包伴著條 ($45), 法包相當新鮮鬆脆, 加上巴馬火腿、蕃茄同爽脆生菜等, 又係勁清新美味, 好鍾意!
依份餐又係加$15要了美式香草扒蝦, 繼續好味; 而同上的steak cut fries又係超邪惡而美味, 好滿足!
以上價錢仲已包即磨咖啡或茶, 而且唔收加一, 超級抵食架!!
當日早上才飲完熱檸水, 中午又超熱, 俾自己放肆少少飲杯凍檸茶少凍, 最後飲了半杯唔夠, 幾乖!
食客亦可加$8改選特色飲品, 老友Cha點了Capuccino, 泡沫好豐盈喎, 據講都唔錯~~
老公則點了凍熱情芒果茶, 味道酸甜交錯好清新, 真係唔錯呢~~
老友Dora就點了凍薄荷朱古力少冰, 睇落都幾對辦, 下次我都要一試 (半杯咁多啦!)
惠顧brunch set仲可加$18享用每日精選甜品, 當日係Panna Cotta, 都算香滑~
新開仲有9折咭優惠, 我地4個人又加小食/甜品, 又升了3杯飲品, 埋單都係$233, 抵!
除了爸媽, Matthew仔都好鍾意食依度的蛋汁撈飯架~~
又, 俾大家睇下Matthew仔後腦的孿毛啦, 自從佢頭髮生長左就變成咁, 好cute!!
), 佢的手打牛肉漢堡好得!
Matthew仔食飽飽, 開心同我地玩啦~~~ 
真係笑得好似媽媽呀~~~
絕對係可以一串魚蛋引得走的為食豬!!!
雖然有Matthew生力軍的加入, 不過再咁食落去應該郁唔到架啦.. 都係時間去打波啦!
是日我地book下樓下壁球場 (1小時), 不過其實打壁球好累, 大家真正打的時間都係半粒鐘咋~~
其餘時間, 都係俾Matthew仔表演~~ 好動豬睇黎幾有運動細胞, 好多動作有板有眼架!
依張執波的動作非常之型!!!
媽媽相信, 再過1-2年買塊BB球拍俾Matthew, 佢就可以同爸B開心打波了~~
唔知係咪男仔對於波類都特別感興趣呢? 當日Matthew都玩了好久好久~~
仲有, 媽媽要認罪...... 當日我教壞個仔, 見到D波一時衝動「塞」左2粒入Matthew件衫後, 之前衰豬係咁要將D波塞入衫, 「裝假狗」呀!!
不過個時冇相機o係手, 影唔到個爆笑場面!打到差不多, 仲去埋隔離舞蹈室玩~~
嘩, Matthew仔都相當有跳舞天份喎!!!
做完運動 (其實我都冇打過), 我地依斑大食積又去食金玉滿糖食糖水啦!!
大家唔太餓, 只點了2人餐B ($182) 分享, 內容包括炆牛肋骨煲, 加了紅白蘿蔔及紅棗去煲成的湯底超甜, 牛肋骨亦炆得超稔而且入味鮮甜, 帶少少膠質更加吸引, 成品好好好味!
煎海鮮蔥餅, 香口而且唔會太油, 好食, 同埋估唔到份量超大, 3個人幾經辛苦先勉強食哂!
2人餐仲包一款自選石頭鍋飯 (石頭海鮮飯除外), 當晚揀了豬肉石頭鍋飯, 加了大量雜菜在內, 非常清怡健康, 不過飯的味道稍淡, 要另加韓式辣醬先夠味~ Anyway成品又係好巨, 飽C人啦..
套餐仲包2杯冷熱飲品, 老公同Cha分別揀了凍紅棗茶同凍柚子茶, 試了前者好清潤好飲喎!
今餐加一埋單剛好係$200, 好抵食, 下次要黎試埋鐵板牛仔骨、人參雞湯等
又, 因之前玩得太盡興, Matthew晚餐時段訓到豬仔咁, 返去仲俾爸爸鏟走一pat頭髮添!!
(其實上面都有相睇, 佢後面頭髮好長好孿而且好厚.. 主要鏟走的就係該部份
)
好飽足好盡興的一個週末, 期待遲D再食再玩過~~~
留言
發佈留言