復活節墾丁 + 高雄之旅 DAY 2 (下)

大家係咪好心急想知埋DAY 2下半的行程呢? 好的, 媽媽就繼續去片啦~~~  



話說我地去了紅柴坑漁港, 準備參加小海豚半潛艇的40分鐘海底觀魚之旅!!


後面就係我地將會搭的半潛艇, 由於要等到差不多客滿先會開船, 我地就先在岸上玩啦~~
 

出去行又太曬, 留o係原處等待又太悶, 結果好動豬發掘左一個新玩意----起人地的螺絲釘!! 
 

堅持有耐性的轉下轉下, 又真係俾佢起左口螺絲釘出黎喎! 大家睇Matthew個樣幾得戚! 



天呀, 再玩落去佢應該會拆埋人地張椅了, 好在依個時候終於有得入船了~~~

船的設計如圖, 乘客在下層已經可以見到水底架啦! 不過上船後都等了廿分鐘先人齊開船呢


未開船前, Matthew仔反而仲對間中飄游過來的魚毛仔好感興趣~~~


但到開船後, 佢就唔冇興趣睇了... 
好在BB係唔駛收費的 (大人就每位NT$420加保險, 其實都唔貴)
 

依度水算清, 能見度唔差, 但D魚同珊瑚就唔可以同Samui外島, 仲有馬爾代夫相比啦~~
 
(sorry, 之前最後2次去陽光與海灘就係咁靚的地方... 對墾丁其實好唔公平的!)
 


依一帶的海床好多礁石...... 其實隻船邊開, 我邊諗如果撞礁都幾大件事喎~~~


雖然唔係好清, 但依張其實係拍到最多最多的黃金魚 (中間位置), 數目應該有百條以上!!


仲有見到有人浮潛呀! 感覺都幾funny~~~ 



來一張一家三口 (妹妹影唔到啦~~) 的合照啦, 大家睇下Matthew仔做緊乜? 竟然係玩媽媽拖鞋! 

其實o係玩媽媽拖鞋前, 佢仲不斷玩媽媽手機, 仲拍左幾十張相添, 包括海底照~~~
 


仲有依幅我暫且名為「母與子」的雙腳合照圖, 實在係非常之有藝術感呢! 



搭完半潛艇, 之後我地又去左另一個沙灘----白沙灣遊玩~~~


依一帶的礁石比較多, 同樣依個沙灘都會有較多礁石外露, 成為佢另一個特色~~


風景都好唔錯架~~~ (以下相片全是媽媽的細機作品)




Matthew仔見到有姐姐游水, 馬上好激動手指指! 傻豬, 都係返到Resort再游安全好多呀~~


轉個頭, 好動豬又唔知由邊度搵到個椰子玩了~~~



爸爸的作品~~ 個椰子同Matthew件衫仔有無再襯色D呀?? 
 


依個Trip好似好少影老公添, 來一張藍天海灘下的背影照都好丫~~ 



之後司機兜返我地去鵝鑾頸, 因為該處的風景好靚, 而且可以話係墾丁的重要地標之一!
  

依個公園要收每位NT$40的入場費, 不過當見到咁靚又乾淨的大草地, 覺得當係草地維修都抵哂!
 

好動豬超眼訓了, 我地連鞋都留o係車上, 打算推車出黎氹佢訓, 但見到草地咁靚, 忍唔住俾佢四圍跑!


再次Hyper到癲了傻了~~~~ 



大家有冇好奇Matthew手揸咩野? 其實係司機的遮光布, 衰豬死揸唔肯歸還, 後來俾風吹到差D唔見!


大家都玩到好盡興好累了, 由媽媽拖返好動豬返去自己的坐駕啦~~
 

由於爸爸未執相, 依2張色彩有點失真, 不過個份親子情深的感覺真係好好呀~~ 

 
各位, 雖然依個燈塔唔係好靚, 不過就係鵝鑾頸的item之一, 當地好多手藝品都係以佢為主題架!


又來一張合照啦, 雖然媽媽其實被陽光曬到開唔到眼咁滯~~~


媽媽咪著眼用機仔亂拍的一張相, 俾大家睇下就係有咁曬!!!


靠海的一帶風景更加優美動人了~~~



仲超級大風添!! 依一張係咪拍到超有動感? (同時好慶幸為Matthew帶了一件較厚身的風褸仔)



除了一條大道, 鵝鑾頸公園仲有幾條小道, 不過就有幾級樓梯, 唔適合推車去行

我地為氹Matthew訓稔D (累累豬上車冇耐就訓啦~~), 都行左小段, 叫做見到依個滄海亭同親吻石~~
  

由滄海亭望出去的景色~~ 都係出面較為靚景~~~


與熟睡的Matthew再折返的士上, 司機見時間差不多, 又帶了我地去關山睇日落~~


見Matthew訓得咁稔, 今次我地打算偷雞一次, 唔帶佢出黎改留在車上訓, 順便享受下2 (3) 人時光~~


始終唔係好影到個肚, 都係媽媽獨立來張大肚照啦~~
 

雖然o係相中唔覺, 但當日我覺得係唔少路人望著我的! (可能等日落冇乜野做啦)


我又影張先~~ 不過影完依張, 就無得再影了, 因為Matthew醒了, 仲馬上大喊要搵爸爸媽媽!! 司機好好人, 特地抱佢跑上山搵我地, 當見到喊到傻的BB, 個心真係好痛呀.... 

雖然Matthew好似好大個仔, 但其實都只係歲半唔夠的BB, 訓醒冇左親人真係會好驚架.. Sorry ar, 以後媽媽都唔會留底你一個了... 



個下當然冇影相, 亦無心再欣賞日落, 只係不斷拍+鍚返Matthew, 希望氹佢令佢安心返...

故此以下的日落美景, 就全靠爸爸拍下來, 媽媽先可以補返欣賞~~~




睇完「驚心動魄」的日落, 時間仲未到七點, 司機超好人又車我地去最後一站---出火特別景觀區

好動豬又開心返哂, 準備同我地一齊玩「出火」, 其實即係「煙火/煙花」了~~~


未抵達專區, 已經見到有人放煙花啦!!


特別問了有咩煙火比較適合小朋友, 店員推介依款只燒不爆的金剛棒, 當然都要小心唔好燒親BB~



首次接觸煙火的Matthew仔, 既興奮又緊張, 肉緊的表情俾爸爸拍下來了, 超搞笑!! 
 

初時少少驚, 後來就玩到欲罷不能, 唔願放手添呀!!!


媽媽部機冇得較秒數, 就由爸爸影下我地鬼畫符的過程啦~~~ 依個係零難度的圓~~


仲有難度一分的M, M for Mama, M for Matthew!! 


想畫星, 不過時間唔夠少了一角呀~~~


仲有心都缺左一忽.... 算啦, 已經好開心好盡興了~~~


最後司機車我地去墾丁大街 (原定係送返Resort, 不過個邊冇野食), 已經係夜晚7:30pm, 真係玩左足足十個鐘, 超盡興!! 咁樣收NT$3000 (另外仲有D過路費, 不過唔多), 真係好抵玩呀~~ 
 

第2晚主要食返第一晚覺得有興趣, 但又唔夠位試的小食, 包括炸地瓜薯條 (NT$45, 即係蕃薯條! 甜甜地幾好味), 同埋燒脆手豬手 (NT$100), 比起Smokey Joes的出品更加美味! 


在50嵐買了杯好好飲的茉香綠茶, 大大杯先至NT$25咋!


又食了難得係烤, 唔係炸的花枝丸~~ (台灣真係好多炸物, 其實我麻麻鍾意)
  
題外話, 老公話自己依張影到好似Matthew喎! 雖然, 全世界都一致認為Matthew靚仔好多 


仲有首晚飲恨的燒辣雞翼 (NT$40隻), 一定要補中啦~~~


試了原味同少辣味, 辣味真係正好多, 雖然都真係好勁媽媽唔太敢食得多~~


仲有依攤賣泰式香蕉煎餅的, NT$60一份, 做得好好食!


好貪心的要了朱古力、煉奶同蜜糖味, 十分香甜軟熟美味呀!  揀了較少醬的底部, 仲有新鮮香蕉俾Matthew仔, 為食豬食到lam lam脷呀~~~


仲有對Resort對出的幾間窯燒pizza車店都好有興趣, 去了人氣最旺的一間波波試食先~~


Matthew遇到一個好鍚佢的哥哥, 仲送左件玩具俾佢添! 可惜好快就整唔見左~~~


海鮮pizza (NT$250) 好薄夠脆, 入味好好食呀!! 而且成品唔算太油, 俾左帶芝士的邊位Matthew食~


老公發神經, 決定試埋對面另一間窯烤pizza, 我今次只係觀戰~~~


傻佬至死一刻仲懶係開心興奮樣... 到試了第一件就知瀨野, 因為依間同對面差好遠!!


不過有人為了獎金 (我講笑話佢食完另一個pizza就俾$300) 真係博老命去食, 仲要中間經歷Matthew倒哂水樽的水 (綠茶一早飲完啦)! BB覺得倒水好開心架! 但要乾啃的老公就呼天搶地, 仲為了解渴連Matthew的奶都唔放過, 絕對係笑笑笑C人~~~   同老公& BB一齊去旅行, 真係超開心囉!



第2晚返到Resort約莫9點, 其實泳池仲有開架, 不過見氣溫比較低, 冇帶Matthew再去游水, 但就去了Children playroom再玩多半個鐘, 然後再返房沖涼訓覺~~~

係咪覺得我地的旅程好豐富? 但差不多到尾聲啦, 因為DAY 3就去返高雄, 個度好悶架.. 聽日再講!

** 想得知最新飲食情報,可追蹤 甜魔媽媽;欲得知甜魔一家消息,就追蹤 Matthew and Chloe 吧~~

沒有留言:

發佈留言