多得尤特, 試食後的翌日, 媽媽又放了整天颱風假, 可以嘆美食又可以陪著Matthew, 超開心! 
當日一家人連同姐姐, 近近地去了屯門市廣場的Outback Steakhouse食lunch~~ 其實此分店已經開張一段日子, 但去到8/9的週六媽媽才首訪, 發覺又唔錯於是隔幾天帶埋老公BB再食過!
餐廳分為室外位同室內位, 室外位好鬼hea (亦係一直冇去食的原因), 但其實店內環境OK的~~
寫左8/9的lunch先啦, 依度午餐去到3pm, 包括麵包、是日餐湯同迷你沙律, 都幾豐富!
除了熱暖可口蜜糖麵包係至愛, 是日餐湯的芝士忌廉湯都好香濃美味, 而沙律配上honey mustard sauce都好清新開胃, 依個頭盤唔錯呀!!
主菜點了Baby Back Ribs with Aussie Chips, 大大份七支骨都係$76咋, 好抵食, 搞到媽媽馬上用手機影相whatsapp約了學生掃街的爸爸, 但之後就大意忘記用返相機影了....
算啦, 轉了新手機 (都要多謝老公
) 後, 影相效果算係出得街, 如圖可見真係好大份架!
算埋杯檸茶, 加埋一都係$84左右, 相當抵食呢, 所以相隔幾日趁有打風假又來了~~~
其實我地出發之時仲係8號波, 但打去問餐廳照常營業, 而且午市都會提供生日甜品優惠, 馬上訂了3大1小, 叫埋姐姐gogogo啦~~~
來到店方都幾好丫, 除了三位大人, Matthew都有包包食! 
沙律同上次一樣, 不過餐湯就換了一款豆湯, 味道冇咁濃郁, BB都飲了少少~~
抵埗前已食飽粥仔的Matthew仔有玩具玩, 好開心呢~~~ 不過都唔夠甜品下場開心!
姐姐柯打了Outbacker ($76), 超細食的她當然食唔完, 分了一半出黎俾我同老公呢~~~
好鍾意Outback的burger, 雖然唔太厚身, 但漢堡肉質粉嫩而且非常juicy, 好味架~~~
我就點了Grilled Chicken & Swiss Sandwich ($76), 雖然叫三文治, 不過都係burger形式上檯, 味道都唔錯架, 超like配料的蕃茄、生菜同甜洋蔥, 清新又味道豐富!
老公就要了我上次點的Baby Back Ribs with Aussie Chips, 今次少了一支骨, 不過加埋粗薯都好豐富, 而且依度的薯條又係好食的~~ 不過是日大家都食唔哂D薯條呢, 因為仲要留肚呀!
午餐的飲品點了凍檸茶x2, 其中一杯俾姐姐, 另一杯我同老公分享~~~
仲有一杯熱咖啡都係屬於老公的~~~
hehe, 之後來到最為期待的甜品環節, 見到Matthew咁開心拍手, 就知道有正野啦!!
Yeah, 冇錯, 除了店方送上的Cheesecake (慶祝我的8月生日), 我地又散點了Chocolate Thunder, 同時上場好開心呢! Matthew仔一見點起蠟燭的甜品, 就笑到香蕉眼, 仲努力想吹蠟燭, so funny!
http://www.youtube.com/watch?v=ztb8Xh3lq3E
hehe, 如果Cheesecake係店方送俾媽媽的禮物, 咁Chocolate Thunder就係媽媽向颳風尤特致敬, 多謝你在我正式放產假 (8/23) 前, 帶來美好一日假期啊~~
然而媽媽不嬲食野前要餵飽相機, 依家除了相機仲有instagram添!! 但為食Matthew就好明顯等到超不耐煩, 好想快D開餐了~~~
食得啦! 依個Chocolate Thunder ($56) 真係十年如一的超美味, 最面層的忌廉可以不理, 但中間巨大的雲尼拿雪糕球, 同底層充滿咬口的香脆熱暖濃郁brownie實在太夾太正, 超好味囉
KO完有雪糕的Brownie後再慢慢嘆Cheesecake, 其實都非常之唔錯, 芝味香濃又滑身, 好味!
睇下, Matthew仔一啖接一啖咁不斷食架~~~~
好滿足的一餐, 特別開心產前完成了Chocolate Thunder的心願, 坐月時無怨無悔啦~~
Btw, 是日由於打風落雨關係, 我地用返舊車, 先發覺Matthew真係大個左好多...
依隻未夠2歲的BB真係好高丫... 個頭完全突哂出黎, 所以換車真係有道理同必要架!
食完飯8號波都落啦, 我地去了行V city~~~ (其實8/9當日媽媽買完野都去了行, 依日係二訪了
)
Matthew仔十足一隻小甜魔, 馬上向朱古力櫃跑去~~~~
又o係人地個台跳跳紮, 無時停!!!
今次再訪, 感覺仍然覺得V city麻麻好行, 可能始終人太多啦, 特別3點後人潮暴現!! 不過8/9到訪時, 媽媽見到許庭鏗, 今日又到Eason將會8/24 (hehe, 媽媽生日正日
) 到訪, 都咪話唔巴閉! 
之後我地又去了天水圍屏山圖書館 (真係好適合小朋友去), 夜晚再返99家開餐, 好充實的一日!
今晚順便介紹埋屯門baby Cafe, 其實又係8/9當日媽媽食完Outback, 買完野後的Tea, 真肥
環境style同尖沙咀i-square分店好似, 不過就係自助買野, 同埋先付款後食野, 類似Euro go go個挺
下午茶時段好多人架, 我都等左一陣先有位~~~
付款後其實都有人送餐, 拎住個牌o係度等一陣就有得食啦~~~
首先係當日特飲的洋甘菊茶, 我要了熱的, 味道清甜好得喎, 如果換上靚靚瓷杯閒閒可以賣到$30以上架, 不過依家就係下午茶餐附送, 好抵飲~~~
實不相瞞, 其實我是為了心太軟而來~~ 依款比利時78%黑朱古力心太軟配雲尼拿雪糕, 散點價$39, 但下午茶餐只售$36, 仲附上一球有雲尼拿籽的雪糕, 真係超平囉~~~
雖然熔漿不及其他baby Cafe分店濃郁, 不過實在好流心令人興奮, 味道都算中上~~
心願差不多完成得七七八八, 再食埋幾場重要的生日飯, 妹妹妳就可以隨時出黎啦!!
留言
發佈留言