這間米芝蓮一星的中菜廳幾巴閉架, 原本我地想訂中午 (餐牌同晚市一樣但多十數款點心), 但早3日已爆滿, 唯有改訂晚市啦! 而且原來餐廳原址正值裝修, 是晚改在上一層的海景廳用餐~~
其實無所謂啦, 只差一層景觀差不多, 環境又一樣充滿雅致而充滿氣派, 坐得好舒服~~
不過8/24全日天氣都係一般, 原本非常迷人的維港美景變得唔多吸引.....
其實都有點意外咁高級的餐廳俾BB入去... 後來Matthew搞到非常嘈嘈閉, 都有唔好意思呀!
講起上黎, 依隻豬仔真係好幸福, 明明係媽媽生日, 點解會有禮物收架??
餐廳方面又送上玩具俾Matthew玩, 依家做BB真係好幸福呀~~~
好開心媽媽都禮物收... 多謝哂婆婆同姨姨呀~~ 好在一早準備了回禮禮物了!
趁天未黑哂來張合照啦!! 初時Matthew仔都肯俾戲架~~~~
不過依度豬仔無乜耐性, 一影多2張就「喵」哂咀.... 個表情笑C人!!!
8/25翌日老公要又要參加10K比賽 (馬拉松), 都係快D點菜啦~~~~
以非常清香好飲的龍井開胃後 (好正的, 是晚我唔理咁多飲埋一份
), 店方又送上位上的小吃
媽媽部機的White balance錯哂, 都係貼老公的大機相, 依舍粟米蝦膠小吃唔錯的~~
不過其實更正係脆合桃, 超鬆脆又甜蜜好好食, 我地前後食了兩兜~~
招牌推介的黑松露窩貼大蝦 ($188), 其實即是加了黑松露的名貴版蝦多士, 依度做得好出色, 金黃香脆得來一點不油, 蝦膠充滿鮮味再加上幽香黑松露的點綴, 加少少喼汁, 完美!
反而最馳名的龍帶玉梨香 ($188) 雖然都好食, 以甜梨來襯托帶子及蝦膠的確更能帶出鮮甜味,
但我們一致認為整體滋味並不及窩貼蝦呢~~~
都係招牌推介的脆釀鮮蟹蓋 ($180 x2), 香脆金黃飽滿的蟹蓋香得不得了, 拍照後趕緊趁熱吃!
中間蟹肉多到呢, 而且非常鮮甜細嫩, 比中午份Crab cake足料好多, 稍點醋吃更加一流, 好食!!
婆婆同老公都嗜辣, 雖然唔係推介都來了一份梅辣茄子鱔球煲 ($250), 鱔球肥美而肉嫩, 配上微辣帶甜的醬汁非常開胃; 同上的茄子又炆得軟稔可口, 我都覺得吸引, 老公馬上大叫「白飯」!
是晚好多菜式都麻麻o岩玉仔姨姨呢, 特別為佢點了一份瓦罉花彫豉油雞 ($230), 正好又係招牌推介~~ 其實成品唔太食到花彫味, 不過個汁真係幾香, 雞件亦嫩滑入味又不會太咸, 唔錯的
頭幾味都係炸點比較膩, 加上我的食力大減, 去到瑤柱蝦籽燒伊麵 ($180) 雖然都好味 (鍾意佢唔會太咸!), 大家已經慢哂手腳.... 最後打包了大半拎走~~~
雖然帶了粥仔俾為食豬, 不過見到伊麵唔油又唔咸, 又俾佢試少少啦, 佢都食得好開心!
(按: 我非常有階段觀念, 樓下的平價酒樓打C都唔俾老人家拎野俾Matthew食, 但去到高級餐廳會破例... 仍住D食物用料、調味都會靚D, 同埋冇咁多味精, BB都可以安心D試食
)
其實欣圖軒的甜品選擇都幾吸引架 (不過冇壽包), 但要留肚俾一磅的Mango Cheesecake, 所以放棄沒點了~~~ Hehe, 再次祝我生日快樂呀!!
又來一張大合照啦, 今次用媽媽機仔, 拉埋爸B一齊影~~~~
初時Matthew都OK的~~~
不過之後玉仔姨姨話要再影, 影完人又再影蛋糕、手機, Matthew又再開始炆了......
Matthew卒之忍不住爆喊了!!「妳地影得好耐呀!! 到底我幾時有得吹蛋糕呀????」
個陣喊聲真係驚天地泣鬼神架, 搞到全場望住我地, 媽媽真係超級唔好意思呢.........
係咁氹左一輪, 又將蛋糕放返BB面前, 慢慢Matthew終於冷靜返落黎~~~
好一個易喊又易笑的貪玩為食B! 見到蛋糕又開始甜笑了~~~~
睇下佢雙眼同臉頰, 仲係梨花帶雨架~~~
Matthew係都要多手摸下生日牌~~~~
玩完一輪, 真係吹蠟燭啦~~~~~
Yeah, 熄左, 好開心好滿足呀~~~~
件蛋糕同樓下洲際扒房的Cheesecake有得揮, 係超rich濃郁、挺身實淨的貨色, 冇錯芒果的酸甜味好出, 加上厚厚的餅底好好味, 但實在係非常之飽呢! 除了甜魔媽媽, 無人能完成!!
搞到媽媽另外買來回禮的Pierre Hermé macarons食唔哂添... 剩了一半帶返屋企~~
最後餐廳仲有中式的Petit Fours, 除了中式的酥點 (合桃酥好好好吃!!
) 仲有月餅添~~
連上75折, 又唔算好貴喎, 抵食又滿足, 多謝婆婆、姨姨同老公啦!!
又, 一連串的生日飯終於食完, 要多謝埋妹妹Chloe乖乖冇搶閘, 俾媽媽享飽口福, 以後鍚哂妳同埋哥哥呀~~ ** 來到39週, 媽媽真係隨時作動入院生得!! 由於Yahoo Blog係預先寫定set時間出街的, 未必咁快update到, 如想緊貼情況, 請like下Matthew and Chloe fanpage, 以得到最新通知!
** 最新消息 : 真係估唔到Y! Blog要執.... 食評媽媽仲 f未諗到點算, 但Matthew同Chloe的最新update暫定會放上Matthew and Chloe, 各位blog友一定要like page, 保持聯絡呀!
留言
發佈留言