最新泵/餵奶進度

復工已經兩個星期,其實甜魔媽媽已經完全習慣了泵奶的生涯,同時Chloe妹妹也一樣對奶樽的接受度提高了不少,今天又來記錄一下,等其他的在職人奶媽媽可以作為參考~~

平均產量 (上午)
突飛猛進的一次
個人來講,返工泵奶的最大問題在於book房 (詳情請參見前文《返工泵奶》);有時因為時間不對,甜魔媽媽要被逼泵三次奶,洗野也洗到心煩!! 洗泵這個動作,我必定是泵後即做,而且是用公司的滾熱水爐 (不是蒸餾水機) 的100度滾水去浸熨兩次以上,講真都幾花時間的,所以在有房的日子,每朝七點多餵完奶 (埋身約廿分鐘) 的甜魔媽媽 (之後要再揸清,約兩安),會在10:45-11:00點,以及3:00正去泵奶,每次為期20-30分鐘,上午一般泵到8-8.5安,下午就多數6-7安,然後5:30pm準時收工,6:40pm回到家裡再次埋身餵妹妹。所有情況維持不變的話,大多數日子產量都差不多,約15安,而個人會影響產量的因素包括:

  1. 配件有沒有組裝好:甜魔媽媽的奶泵是拜托二人姐姐清洗及組裝的,她常常沒有「啪」實,很影響到產量及快慢的!
     
  2. 夠瞓與否:相比進食,今胎甜魔媽媽明顯感到睡眠對奶量的影響更大;事實上,每天上午的產量都好過下午,也與精神狀態有一定關係,下午我總是超累的,試過數次泵到恰著,但工作太忙又沒有時間中午來場午睡!
     
  3. 心情:happy friday的總產量會比平常日子多1-2安,而在心情不佳的日子,的確沒那麼易谷~~
     
  4. 出門前有否清奶:有天早上出門前沒有揸清,上午那次特別谷,就突飛猛進一次過泵了差不多12安士奶! 其實谷一點是較好泵的,所以個人非常偏向只泵兩次,反正泵三次的產量也只多一安半安,卻麻煩了很多,不划算呢!
     
  5. 冷熱度:房間太凍的話,會較難出奶,較久才泵到同樣的產量,反而亦然。
      
  6. 泵奶時間的長短:個人對電泵的刺激不算很激烈,是細水長流型,至少要泵廿分鐘才稍為清,去到30分鐘就應該有八九成清 (因為之後用揸還可以揸出約一安士奶!)。也講講出奶情況:個人泵奶時首5分鐘出奶是慢的,6-15分鐘的最快最多 (夜晚去tasting就多數泵15分鐘,不谷就算),之後又開始慢,不過就長泵長有,慢慢滴。一般來講,上午我會泵得久點、清點,下午就廿多分鐘收工,反正回家有妹妹幫忙清奶,不再怕塞!
講起怕塞,每天返工甜魔媽媽也有吃卵磷脂防塞,因為,塞奶真的太痛苦了...翻看舊照片,抽塞奶後血水流個不停,而我總共經歷五次抽奶那麼多!!! > <


也講講Chloe妹妹的吃奶進度,每早7:00開始吃奶 (最遲7:25am也要叫醒她開始吃奶,不然媽媽要遲到啦!),約吃半個鐘後,她要到11點多才再餓再吃。而份量由首週的一安士 (!!!),慢慢增加至3.5安左右,下午再吃1-2次奶,日頭總飲奶量9安士左右。最近媽媽拜托老人家幫忙氹她要吃到4安士左右,然後隔久一點再餵第二次,等她第二次吃多點 (4-5安),然後再等媽媽回來幫忙啜清,這樣也可以配合到媽媽的泵奶時間。
 
不過計一計數,大家就知道泵奶的產量其實比妹妹的吃奶量多了6安左右,加上半夜甜魔媽媽一定要起身揸奶鬆一鬆 (妹妹每晚10點左右吃完最後一次奶,會睡到4:30-5:30再起身,只飲一邊後又睡),每天大概多出11-12安奶之多! 不過去到週末,全埋身的Chloe妹妹日間幫媽媽清得差不多,我只需上午揸2-3安鬆一鬆,差額就沒那麼大。所有多出來的媽媽奶,都會轉給Matthew哥哥,所以平日Matthew差不多可飲兩餐媽媽奶,週末就一餐左右;同時雪櫃內的冰奶基本上清了又有新的,十分飽和!
   
相比第一胎又塞又少奶 (初期要keep住補奶粉...後來也很緊張,冰奶數量一隻手指數得完!),今胎的餵奶算是很順利,有充足盈餘同時又未至給奶追著來泵 (曾有同事真的多得很誇張,一泵就是廿安! 其實那不是福氣...),還可以中午間中飲飲奶茶 (下午的奶就留給Matthew囉! =P),實在很感恩~~ 反正甜魔家應該不會再添寶寶了 (上次哥哥就是因為懷孕而停奶),媽媽希望今次可以持續餵哺到Chloe妹妹兩歲以上啊!
 
又,如果大家有任何topic想甜魔媽媽分享,也可以留言,一起交流交流呢~
 
 
** 想收到兩小兄妹的最新消息,可以like一下Matthew and Chloe fanpage哦~~
 

17 則留言:

  1. 你就好啦, 餵得好輕鬆呀
    我日日追奶, 好境嗰日啱啱好, 唔好境就少半餐,壓力好大,依家囝囝開始食固體, 本來想停餵, 但最近見啲病毒好勁, 又聽人講6個月後BB 冇咗來自母體嘅抗體會好容易病, 又唔敢唔餵, 我一個人辛苦, 好過細路病嘛

    回覆刪除
    回覆
    1. 第一胎都好辛苦的, 第二胎就順利好多; 媽媽妳辛苦都堅持餵囝囝, 相信如果再生第2胎, 都會easy好多的, 加油!

      刪除
  2. 第二胎有經驗通常都會好好多㗎,D奶真係夠食就OK,太多的確唔係一件好事,媽媽要繼續加油呀﹗
    BTW,我都試過抽針後渣奶出血,真係好得人驚呢﹗

    回覆刪除
    回覆
    1. 係呀, 身邊大部分人都話第2胎奶水比第一胎多同順, 不過其實都有相反例子呢, 點都好餵得順好感恩囉, 希望自己同身邊的媽媽都唔好再經歷恐怖塞奶、血奶事件!!

      刪除
  3. 好媽媽不易做,做在職好媽媽更難,睇得出發Yan為了M&C真的付出許多,實在是super mom!

    回覆刪除
    回覆
    1. 其實都要多得老公同老人家的支持呀, 冇佢地support好可能首胎去到半路已give up了~~

      刪除
  4. 第二胎人奶真係易handle 多D,加油呀泵媽!!

    回覆刪除
    回覆
    1. 妳係咪都好順利呀? emma妹妹好得意, 媽媽都繼續加油呀~~

      刪除
  5. 見到你的「血汗紙」,我差不多嚇到跌落地!
    我自己有間房,但都不知道可否做到番工都BUMP奶。
    不過我會努力的了!

    回覆刪除
    回覆
    1. 想繼續餵落去, 返工一定要泵奶架! 準媽媽加油, 有問題隨時上黎分享交流啦~~

      刪除
  6. 公司有熱水爐又可以泵奶,真係好好!
    我公司只有水機,又open,又忙,只有lunch時去K11的bb房泵,有時bb房比人用了,要去傷殘廁所泵呢!

    回覆刪除
    回覆
    1. 做在職人奶媽媽係唔易的, 都係個句, 政府的配套根本冇做好....咁下胎妳會繼續餵人奶嗎?

      刪除
    2. 一定会!到時一定会有問题,要约定你依個人奶媽媽教授添!

      刪除
    3. 好呀, 第2胎好多人都順+多奶好多, 妳有問題就搵我啦!! ;)

      刪除
  7. 咁就太好了, 第二胎就不用勁追奶

    回覆刪除
    回覆
    1. 係呀, 仲多到係咁要俾哥哥飲添~~~
      不過初期出街會麻煩d, 好鬼易谷囉

      刪除