Albergue 1601 ~ FHY澳門行的完美終結篇 (Yahoo copy版)

來到最終篇, FHY在澳門最後晚餐, 去了婆仔屋Albergue 1601食葡菜! 

 

婆仔屋正名是荷蘭園望德堂, 位於瘋堂斜巷8號, 無論是街名抑或四周環境, 都好有風味呀


由網上資料得知, 婆仔屋已經擁有442年歷史, 過去出名是自梳女終守一生的好歸宿. 近年不少藝術家進駐, 活化成文化創意天地, 其中一幢黃白歐陸小屋就裝成是晚食飯的Albergue 1601!

聽上去都好值得期待呀~~~ 


依個就係餐廳的外觀, 古樸得來很富親和力, 俾人印象好好!  
有興趣可去官方網睇更多資料/圖片: http://www.albergue1601.com/index.html
 
媽媽又諗起了香港的1881 heritage.. 相比之下HK的古蹟活化, 點解商業味濃咁多o既?



我地可揀坐室外位, 又或樓上雅座, 其實兩者都好有風味的!


如要上樓就要先經過依個大堂, 經翻新的舊屋感覺煥然一新, 但仍保留古雅元素~~


依個樓梯就好有懷舊色彩了, 邊行媽媽都邊忍不住影相, 更引起FH仿傚添!
 

我地最終都揀坐樓上, 裝修其實頗簡單, 賣點是高高的樓底, 以及窗外的美景!
 

由樓下往外望, 景色真係好別致呢? 可知這棵古樹, 都係古蹟的重要核心之一!



古蹟介紹告一段落, 接著介紹依度的美味出品!!
雖然, 經過多場暴食, CEO同劉總分別表示只餘40%同0.X%戰鬥力..... 

首先上檯是香脆可口的豬仔包, 明明無肚都忍不住食了半個! 



西班牙同葡萄牙好接近, 因此酒牌上也有廣受歡迎的Sangria, 成為CEO伉儷之選
超滿的一杯只售$88, 我覺得好抵, 但原來一jar只係$238, 真係幾抵飲喎~~

我同劉總就要了Dr Loosen "Dr K" Riesling - Germany 2010 ($98), 十分清甜討喜! 



Albergue 1601主打正宗葡菜, 頭盤方面主理人介紹我們吃了豬耳沙律 ($58)
其實成品爽脆又清新, 幾好食的, 不過自己始終吃不慣豬耳, 最後主攻蕃茄算了~~
 

另一頭盤的白酒檸汁煮蜆 ($138) 就好好好食了, 酒香同檸檬香交融, 加上香菜的奇妙香氣, 令原已鮮甜美味的大蜆好吃得令舌頭打結!! 

又要一讚份量好多 (是香港的主菜size了), 大家都食到超滿足!


接著的蒜茸葡腸焗扇貝 ($78) 又是精彩之作, 巨大而肉厚的扇貝加上蒜茸及葡腸碎焗香, 那啖啖肉的鮮美滋味實在無可比擬, 好正! 



最後一道頭盤是薯絲馬介休 ($168), 與平日吃的馬介休球一樣, 都是薯仔混馬介休的組合, 不過這次是薯絲炒香, 並拌以炒蛋、煙肉及馬介休魚肉, 個人覺得滋味更加豐富迷人, 又係好正! 
 

成品又是大大一份, 吃不完薯絲, 媽媽也努力將中間的馬介休炒蛋部份清光了!!


開始主菜環節, 首先是非洲雞 ($168), 那辣醬勁度頗足, 刺激非常, 吃到CEO嘩嘩大叫, 哈哈! 


又試了燒焗乳豬 ($228), 雖然殘忍, 但香氣令媽媽也忍不住吞下一掉, 的確是皮脆肉香好吸引啊! 

不忍再吃下去, 餘下件數全交其他成員, 只見0.X%戰鬥力的劉總也一再encore.. 魅力可見一斑~~
 


我最喜歡是海鮮湯飯 ($228), 其實才在Miramar吃過超滿意的出品不久, 未想到來這裡又被打動! 


怎麼說呢, 這裡的湯飯比較稀身, 基本上面層的湯可以筆來淨飲的!
湯飯又是非常足料, 味道鮮甜中隱隱帶點saffron香氣, 這一點比Miramar更為吸引~~~

最後這裡的size比較合理, 美味之下大家一起合力, 結果整兜湯飯全部KO了!!

本來主理人還打算給我們試吃燒大蝦, 不過其實在飽了, 還是留肚給甜品吧, 陣容也很豐富~~
這是店方的甜品併盤 ($288), 裡面包含4款甜品及2球雪糕, 如是特別日子慶祝來吃真不錯! 

先試葡菜經典的Serradura 木槺布丁 ($78), 這裡是凍的版本, 製作更花心思, 但那冰凍柔滑滋味實在讚! 椰子香草焦糖燉蛋 ($78) 就是全晚唯一失色之作, 燉蛋不夠滑之餘椰子的味道也不突出
 


之後焗蘋果核桃甘寶配雪糕 ($78) 除有香脆外層, 餡芯也很清甜美味, 原來是用上青蘋果~~
最後朱古力熔岩配雪糕 ($88) 是永遠的心頭好, 味道濃郁又流心, 還配上movenpick雪糕, 完美! 



很多謝主理人的招待, 這真是很滿意的一餐, 而且消費也比預期中相宜合理, 十分推介大家來吃呢!

最後又來一張FHY小組的合照吧~~~ 



最後... 雖然有D大想頭, 但繼澳門美食之旅後, 實在期待FHY將來一起遊泰國啊~~