來到第4日, 亦係行程最豐富的一日, 因為我地去左神戶玩左好耐好耐!! 
是日我地一早食完早餐, 就直接出發啦!! 今次搭的係阪神線, 由難波去三宮, 抵達時11點多D咋~
反而買了幾盒Royce朱古力... 同香港唔同, 個邊咁凍, 朱古力完全唔駛雪架!
繼續行, 同時都係搵晏食~~ 中間有條三宮行人道好多野睇, 不過相比都係大阪的千日前多野睇D!
好搞笑, 行下行下竟然見到東門街~~ 不過依條街比深圳人好多少, 應該係夜晚先會旺!
三宮一帶有多間著名的神戶牛柳店, 亦係我地Day 4的午餐target呀!!
到底去邊間好呢?
我地都係睇書, 去了Moonlight building 6樓上的餐廳 (sorry成串日文唔識打), 總之一入門就見到勁多Cert, 果然係猛料來的!
名店即是名店, 無booking的我地要等成粒鐘先有食... 唯有落街食下其他野頂肚先!
好在沿路過黎時, 見到一間相當吸引的拉麵店---元町軒~~~
(冇錯!! o係天寒地凍的日本食拉麵, 真係一件好幸福的事!!!
)
小店的佈置好親近可愛, 俾人感覺好好~~
仲要留肚俾神戶牛, 只點了一碗雞湯豚骨湯拉麵 (¥750), 個湯超級鮮甜, 豚肉又鬆化美味, 溏心蛋亦好有質素, 好味到真係好想好想encore多碗呀!!
又點了一份小的著名燒豚飯 (¥300), 由爸媽KO泡菜及大部分豚肉後, 少量豚肉咬碎再撈上溏心蛋, 就成為Matthew仔的午餐! 為食豬又係食得好開心!!
食完仲有少少時間, 見到依間鳴內鯛燒本舖好吸引, 又忍唔住買了鯛燒來食~~
鯛燒有兩款口味, 分別是紅豆同奶黃, 我地揀了紅豆的, 盛惠¥140~~
要讚鯛燒皮好薄, 脆口香甜好美味, 引得為食Matthew勁鍾意, 係咁同我地爭食!
下面就係Matthew仔食到鯛燒的連串好味樣喇...
爸爸批評, 佢演技流於表面, 好浮誇; 我心諗: 咪即係似你囉.... haha~~
差不多1:30pm, 有得食神戶牛啦, 我地又上去再食過~~~ 真係食唔停呀!
一家三口被安排就坐依張鐵板燒檯的一邊, 要讚serve我地o既店員好專業又有禮, 令成餐好愉快!
原來我第一次帶老公食鐵板燒咋.. 大鄉里話好開心好滿意喎~~~
Table setting頗為簡單, 唔簡單係食材本身, 非常優質美味, 令人十分回味
而且午市套餐唔太貴, 唔計唔入流的和牛漢堡, 其他和牛鐵板燒都係由¥2,625起, 最貴的神戶牛鐵板燒定食都係¥9,240, 比起晚市平左接受一半, 好抵呀! 當初來食午市只諗住夜晚唔駛趕車去, 點知慳左, 勁開心!
一場來到, 最貴的神戶牛柳 (110g) 餐一定要食啦! 另外幾款午餐的主角都係和牛, 分別只係size唔同, 反正已有拉麵同鯛燒打底, 就點了最平的和牛 (90g) 定食, 一齊分甘同味~~
先介紹貴餐的內容, 首先有Aburi of beef, 輕灸過的神戶牛脂香極其迷人, 點少少醬油吃, 仲豐腴滑溜過食拖羅呢!
又有湯身清甜、牛尾軟稔的牛尾湯, 味道好正的!!
仲有田園沙律都好清新開胃, 正呀~~
先介紹貴餐的內容, 首先有Aburi of beef, 輕灸過的神戶牛脂香極其迷人, 點少少醬油吃, 仲豐腴滑溜過食拖羅呢!
又有湯身清甜、牛尾軟稔的牛尾湯, 味道好正的!!
仲有田園沙律都好清新開胃, 正呀~~
其實平餐都有一模一樣的沙律, 另外仲有十分香甜的粟米湯, 但就無頭盤喇!
兩款鐵板燒都有一式一樣的燒野菜, 幾好丫, 可以清下腸胃, 而且佢的野菜真係幾好食的!
主角上場啦! 好明顯前面脂肪多好多的, 就係110g的名貴神戶牛, 但後面件90g和牛其實都好好食!
師傅開始做野啦, 咪睇佢好似好後生, 功架一流的, 邊同我地傾計, 邊將食物燒到剛剛好滿分!
話咁快, 野菜就燒好了, 仲排得非常整齊四正添!
除了紅白蘿蔔甜到暈, Matthew仔都搶住食, 蒜片又係奇脆無比, 好精彩的~~
開始燒牛柳啦, 只需三兩下功夫, 師傅就將成件牛肉肢解成非常平均的幾小塊, 出神入化啊!
依款就係日本和牛, 每人分到5件, 我再俾多舊老公
其實我地都覺得簡簡單單的和牛, 已經超級無敵好好好好好食囉!!
反而去到神戶牛柳, 唔係唔好食, 但肥美的程度已去到無乜牛肉組織, 更似食緊拖羅而非牛肉
所以我地一致裁定, 自己係唔識食的, 竟然唔識貴3倍有突的靚牛!!
個定食仲有跟麵包或飯, 老公揀了白飯, 我就要了麵包, 要讚D包全都好香牛油味且勁熱暖, 正!
最後貴餐仲有甜品雪糕送, 平餐本來冇, 但餐廳照送埋俾我地, 多謝哂!
不過味道唔係好突出啦, 雖然都夠Matthew仔痴食得好鬼開心了~~~
老公享受埋貴餐的飲品----熱咖啡, 試了一啖水準都唔錯架~~~
今餐Matthew仲不斷講電話... 係咪開始掛住幾日冇見的婆婆, 嫲嫲, 同姐姐呀?
食到好滿足, 之後繼續行街, 爸爸話天氣大好要影合照喎!! 不過真係曬到望唔到鏡頭呢...
最近發現Matthew仔講野原來已經好叻, 基本上所有親人都識叫, 不過好難拍到佢叫人的片段呢
以下又係o係街頭的片段, 算係佢叫得比較多人的一段, 雖然去到最後都係唔肯叫媽媽...
之後係開心的放狗時光, Matthew仔真係好鍾意咁樣走黎走去架, 仲俾好多日本人讚Kawai!!
行下行下, 見到BAL百貨B2有個children area, 就八卦去睇下有咩玩~~~
原來依個play area要收費架, ¥600小朋友+¥300大人玩半粒鐘, 每過10分鐘再¥100!
不過有Matthew最愛的波波池喎! 好啦都俾佢去玩, 貪玩豬梗係開心到爆啦!!
佢的內容真係幾正的, 如果香港有同類型的play area又做到同樣乾淨企理, 我都會俾Matthew去玩!
玩了N次的sir滑梯, 一落黎就係最愛的波波池, 幾開心!!!
BB大D夠力時, 仲可以玩親子拋波, 好訓練體能同眼界架~~~
單o係波波池就玩左15分鐘有多, 但個場仲有好多野未玩, 唯有捉Matthew出黎~~
同媽媽一齊堆lego車先~~~
我地o既成品, 係咪好靚呀?!
另一邊檯上又有多款memory card game.. 依個遲少少先俾Matthew玩了~~
仲有訓練手指仔靈活的穿珠仔... 簡單得來好有心思!!
影的不夠玩的一半, 不過都冇計, 因為好動豬好難control, 佢又跑去另一個play area啦!!
Matthew仔好大膽, 對依個轉轉氣墊球勁有興趣, 媽媽將佢放入去碌, 有驚但係唔會喊!!
又好奇想試氣墊床, 原本上到去真係幾難平衡架~~~
但好動大膽豬無有怕, 前後跑了5-6個round, 好勁!!!
又去到另一邊「攀山涉水」~~~
Matthew真係好monkey呀.......
自己捐左入去, 後來又自己捐返出黎, 問你服未?!?!
依度咁好玩, 貪玩豬梗係玩到唔願走啦!! 但Matthew已經過哂鐘食奶+爆眼訓, 最後媽媽好忍心咁捉佢出黎 (超時11分鐘俾多了¥100), 衰豬喊到呢... 不過當食左奶又換左片, 累爆的Matthew好快就訓lu~~~
又, 起初都心思思想買架士的車, 好在最後無成事, 因為大車放野太方便啦!!
豬仔訓著了, 我地可以繼續逛, 已經去到元町一帶了~~~
又一個人氣好旺的商業街, 仲頗有中國風情添!!
梗係啦, 隔一條就係南京町啦!! 即係神戶的華人街呀~~~
雖然, 我地點睇都覺得佢好有日本風味~~~
日本人好鍾意食豚饅頭, 但又唔係叉燒包喎, 而係一個豬肉包子~~
我地都有試, 不過就去「黑店」買了一件黑色的細包 (¥100) 來吃~~
其實有少少似未煎過的生煎包, 哈哈!
其他的小食, 都唔太吸引我地的興趣, 都係地道的日本美食正好多!!
出口位的可樂機, 有簡體字同熊貓樣架~~~
之後兜去睇 (洋人) 舊居留所, 該帶頗有洋風, 令媽媽諗起上海呢~~~
其中著名的38號舊居原來在翻新中, 無野睇.....
一場來到, 是但周圍行下啦, 當係瀏覽下神戶內名店林立的高級商業區~~~
另一個著名的15號舊居~~~
出面展示了舊居的水喉俾大家睇~~
咁小小事日本人可以處理得咁認真, 都唔知佩服佢地好定點好!!
有關舊居的一點介紹, 不過爸爸超冇心機睇, 所以又出發去神戶港了~~~
由舊居向港口方向行, 就係神戶港了~~~
時間差不多係黃昏, 正呀~~~
想來張全家福合照, 發現Matthew仔剛好也張開眼了~~ Cheers!!
位於神戶港其實有間海洋博物館, 當然我地抵達之時已經關門啦~~~
進入magic hour, 媽媽都係唔獻醜, 不如睇下老公的大機靚相啦~~~
依個Mosaic都係一個景點, 夜少少我地都有去逛~~~
去Mosaic前先經過又順利逛埋依個篠崎倉庫, 裡面乜都有得賣!!
當中包括Matthew仔好鍾意的貓貓狗狗, 但BB好得意, 無論見到貓定狗, 都係叫「貓貓」~~~
情人節關係, 好多應節的佈置~~~
Mosaic其實係集特色商店, 同異國西餐於一身的旅遊點~~~
靚景係佢最大的賣點, 如果日頭來慢慢逛應該都幾開心, 不過我地要搵地方解決晚餐啦!
考慮過旅遊書介紹的Fishermen's Market, 平日的晚市buffet都係每位¥3,000有找, 超平食
不過睇完D buffet選擇, 又覺得非常唔吸引, 算了......
反正睇書由Mosaic可以去到另一shopping熱點Canal Garden, 就去另一邊搵食了~~
有間百貨, 一入去俾Matthew發現左部麵包超人果汁販賣機添~~
好啦, 買包果汁俾你啦!! Matthew馬上好興奮去執~~~
100%純果汁都係¥80咋, 比香港的BB果汁抵飲好多~~~
覺得Canal Garden冇預期中多野睇, 原來佢同附近的東急百貨都裝修緊....
來睇電器+換片 (Matthew食得太好啦.. o係日本係咁開大!!), 又俾Matthew結識了依位哥哥~~
時間開始夜, 我地本來想返炒有熟食的Nana's Green Tea架啦, 點知依間舖只賣甜品!
好在神戶都算繁榮方便, 我地最後去了JR神戶站附近搵食~~
該帶有好大路的和民、笑笑居酒屋、吉野家等, 不過吸引到媽媽係依間家庭式料理小店
真係好有地道的日本風味呢, 我想食的就係依D啦!!
樸素討好的清茶~~~
唔係用上專業炸爐關係, 吉列豬扒做唔到大型連鎖店的脆身鬆化, 但肉味濃厚, 拌碟的薯泥更好味到爆炸!!
又點了Matthew至愛的親子丼, 依個真係煮得好好食, Matthew仔又係食得超飽足呀~~
食完約9點, 之後搭JR打算直接返JR難波, 原來條線都幾Tricky, 我地要轉2次車先到...
難怪早前酒店教路都係搭去梅田, 再行去JR大阪站轉車啦!
Anyway, 趁返去又在JR附近的超市買了豐富的宵夜, 這晚的士多啤梨係甜到爆炸, 太美味啦!!
難怪早前酒店教路都係搭去梅田, 再行去JR大阪站轉車啦!
Anyway, 趁返去又在JR附近的超市買了豐富的宵夜, 這晚的士多啤梨係甜到爆炸, 太美味啦!!
就係咁, 不知不覺來到旅程留宿的最後一夜... 好在DAY 5都玩到好盡興先離開咋~~~
留言
發佈留言