大家都知我係個唔戒口又周圍走的大肚婆
, 不過再大膽都好, 陀住33週的巨肚, 暑假真係唔敢搭飛機去玩了... 多得公關的邀請, 今週近近地去了澳門金沙城喜來登, 體驗夢工場的魅力, 超開心! 
, 不過再大膽都好, 陀住33週的巨肚, 暑假真係唔敢搭飛機去玩了... 多得公關的邀請, 今週近近地去了澳門金沙城喜來登, 體驗夢工場的魅力, 超開心! 
週二早上, 爸媽帶同Matthew第3次來到上環信德中心, 搭船前往澳門旅行了!
今次行程除了一家四口 (包括埋肚中妹妹
), 仲有拔叔叔同文迪姨姨, 寧舍開心呢!!
抵達澳門啦! 唔知點解每次搭shuttle Matthew都表情多多, 上次聖誕之旅係咁, 今次放暑假又係咁!
Btw, Matthew同媽媽好鍾意上車即送的撥扇, 超得人鍾意, 但之後原來仲有更多豐富贈品呢!
由7/1開始登陸金光大道渡假區的體驗夢工場 DreamWorks, 真係非常全面又徹底, 連喜來登spg的check-in counter都有哂佈置, 令到Matthew一到場就好開心興奮!!
更精彩的好戲在後頭!! 媽媽一直想去住的Sheraton family suite, 現時加入哂夢工場的元素, 變身「獨家夢工場主題家庭套房」, 非常吸引!!
當日公關安排我地入住《史力加》房, yeah~~
房內除有兒童浴袍 (高大的Matthew都o岩著呢), 兒童拖鞋, 又有Wii, 以及全日任睇兒童電影!
由於佈置真係可愛繽紛到暈, 起初爸媽唔敢俾Matthew入黎住, 要到影哂相先敢放監呀~~~
而且要讚好多細節位都勁細心, 例如全屋傢俬都盡量使用柔軟物料, 所有檯或櫃就係圓角/加上防撞膠, 另外全間房的空置電制都有cover, 避免好奇的小朋友將手指插入去造成意外!!
小朋友洗手間基本格局與大人的一樣, 但就加了step up chair, 毛巾狗仔, 以及幼兒用品, 非常細心!
來到主人套房, 當然亦一點不失禮; 其實上媽媽不嬲超鍾意Sheraton的甜夢之床, 超好訓架!
咁正的套房套票原來只由$2,668起, 價錢已包金光飛航單程船票4張, 主題自助早餐 (2大2小), 夢工場禮物袋, 房內免費無線上網服務, 以及「歷險Q立方」免費2小時入場 (個playroom幾正架, 可惜唔夠時間去玩)... 如果連續入住2-3晚以上, 仲會分別額外送2大2小火鍋buffet lunch, 以及2大2小下午茶!
同埋大肚媽媽真係好鍾意房間附送咁豐富又美味的生果, 到埗不久已忍不住KO了2隻~~
今次住的房的view, 正正望到好正的泳池, 後來都同Matthew落去游了兩次水!!
終於影完相, 又到Matthew玩樂時間, 好動豬竟然第一時間爬上了碌架床!!!
睇佢個樣, 就知道依張甜夢之床好好訓啦~~~ 講真, 床單真係好滑好舒服架!
High到呢... 爬去下層再玩過~~~~
雖然Matthew仲未睇過《史力加》, 但佢不嬲好鍾意動物尤其貓貓, 所以超開心~~~
好動豬將座椅變成rolling chair黎玩, 真係high到震呀~~~~
Matthew太鍾意依間房啦, 去到洗手間都可以玩一番!!!
玩左一陣, 好動豬要轉移陣地啦~~~
將佢地全部搬哂出去外面的兒童桌, 等毛巾狗狗同獅子Alex (公仔就係豐富禮品包的內容之一
) 做好朋友!! 
玩到七情上面的豬咀Matthew仔~~~~
「咦, 你地好似都係狗狗? 不如kiss kiss丫~~~」
o係自己間房hyper左大半個鐘, 又去參觀拔叔叔同文迪姨姨間房, 佢地住《荒失失奇兵》套房呀!
公關仲安排我地參觀埋《功夫熊貓》的套房, 真係各有特色, 全部都吸引呀!! 要留意酒店成3,869間房裡面 (澳門依間係全球最大的喜來登酒店), 只得33間家庭套房, 所以要book趁早呀
當日拎完房小休完, 再於公關陪同下享用午餐 (聽日再記), 又繼續感受夢工場的魅力~~ 在金沙城的玻璃天幕下, 設立了4個角落包括《史力加》、《功夫熊貓》、《荒失失奇兵》及《馴龍記》!
每日中午, 角色會每隔15分鐘在主題區出場, 大人小朋友可以開心同佢地give me five同合照架~~
Matthew不嬲鍾意好動物, 為人又大膽, 起初媽媽以為佢會好開心enjoy依part互動的, 點知.....
好啦, 當《荒失失奇兵》出場, 媽媽去過去合照區, 卻發現Matthew唔見左???
原來有人跑開左.... 媽媽將佢抱過來啦, 點知有人開始爆發~~~~~
「救命呀~~~~ 點解D動物突然變到咁大隻架?!??!?! 」
其實班角色都好盡表示友好, 不過Matthew仔始終唔受落, 喊得好淒涼呢~~~~
好啦, 我地離開去另一邊的《馴龍記》啦... 雖然明顯有人又想走, 不過接受度高左D~~~
都肯摸下架~~ 或者條龍同Matthew平時睇開的龍差不多, 所以冇咁驚啦!
開心豬即是開心豬, 雖然之前俾《荒失失奇兵》嚇了嚇, 但好快又無事開心返~~
公關又帶我地去國王朱利安森林小屋拎糖 / 爆谷食, 完全係免費架, 小朋友一定好鍾意好開心~~
為食豬除了有糖拎, 仲有禮物收, 超開心!
據公關講, 如果小朋友參加喜樂童聚的活動 (內容豐富又有特色, 包括熊貓阿寶兒童體操班、獅子Alex曲奇製作班、企鵝4人幫的泳池尋寶遊戲等等..), 並集齊4個印花, 就可以換到公仔架啦~~
之後去參觀埋泳池, 因為連喜來登酒店內的樂陶泳池都有主題化的佈置同改動!!
可以想像小朋友來到會有幾興奮呢~~~
由Matthew睇到眼都唔眨, 就知佢超級恨跳落水啦!! 放心, 遲少少爸爸媽媽會帶你來玩~~~
泳池旁邊的沙灘小屋, 現亦已加上特色主題佈置, 如果帶小朋友來慶祝生日搞party真係一流呢!!
位於泳池露台上Comfyland Experience遊樂區又係好適合4-8歲的小朋友, Matthew仔就再等等了~~
之後出返去金沙城, 因為另一場精彩的夢工場動畫明星巡遊即將展開!!
睇野啦~~~~
好鍾意D角色唔係自己有自己行, 而會同途人及小朋友有唔少的互動; 雖然Matthew仍然係驚!
仲有一個非常特別、不可錯過的活動, 就是翌日的體驗夢工場動畫明星早餐了!!
主題早餐分為8點及10點兩場, 凡惠顧住宿連早餐套票的住客均可加$100/位預訂享用, 一邊嘆著異常豐富的特色星級美點, 一邊同動畫明星又影又玩, 超級開心盡興!!
相比一般的酒店早餐buffet, 依度除了選擇多, 仲好有特色, 味道仲唔錯添~~~
我地去了10點個場, 但BB邊可以咁遲食早餐丫, 所以較早時間已在club lounge (又係容後再記) 先食左唔少野打底, 不過來到時Matthew仍然對特色美點好感興趣!!
除了環境同食物有特色, 最重要是動畫角色會由舞台走落黎同大家互動架!!
史力架同佢的朋友仔出場啦~~~~
初時遙遙相對都無問題架~~~
之後貓劍俠過來同Matthew打招呼, 弊啦.............
爆喊!!!!!!!!!!!!
費安娜又過埋黎, 仲衰~~~~~~
費安娜試下匿埋啦............
但都係俾Matthew發現左, 好激動!!!!
好在史力加冇再行近咋~~~~
之後到荒失失奇兵上場了~~~~
爸爸仲拍左片添, 由video可見現場氣氛真係好熱烈架! 雖然, 片尾Matthew都係咁講「byebye」....
** 由於相多關係show唔到片, 麻煩大家自行click入 : http://www.youtube.com/watch?v=u4kzaAPUxek
獅子Alex又嘗試行過黎向Matthew示好...............
Matthew仔就繼續唔受.... 點解細隻的公仔咁鍾意, 大隻的會咁驚架?!
食下薑餅人定驚啦..............
哎呀呀, 企鵝都好唔掂呀!!!!!
仲有好多角色輪流出場, 不過合照都無Matthew份啦~~~
等到角色全部返哂後台, Matthew仔卒之安心哂, 笑容又出返黎啦~~
雖然為食好動豬的表現同爸媽的預期有所出入, 不過今次的體驗夢工場真係好精彩, 令到一家四口大開眼戒, 估唔到原來依家澳門都有咁全面, 適合親子旅遊的主題設施, 超讚!
大概介紹完今次澳門之旅的重點後, 明後日再記錄今個行程的美食及其他玩樂啦!
留言
發佈留言