餵奶8個半月的白色恐怖 + 甜魔媽媽論清奶

餵奶8個月半,又來分享一下母乳心經,還有一些雜七雜八的事記。
 
坦白說,來到8個月左右,突然覺得身體有點不對勁:大食了,更累了,而且,好似很難出奶了!?!? 一度很擔心是不是真的又再bingo了 (甜魔媽媽的體質太易中招了... 雖然有避孕,但始終都有2%的機會懷孕嘛!),還好早上用驗孕棒去測試,結果是斬釘截鐵的一條線。總算放下心來,但這次的經歷,真的令到甜魔媽媽非常肯定,就算對第三個寶寶有幾好奇 (之前《甜魔家獨門靚B秘笈》都講過,第三個BB特別靚的!),以現時財力、人力、物力一定不考慮再添丁,因為實在不想不願分薄對小兄妹的時間、愛及資源!!
 
既然不是懷孕,身體的頭兩項改變 (大食了,更累) 很有可能是因為轉做FTM太辛苦的關係。真的,做FTM絕對比返工更忙更累;關於這點不細述了,有興趣看看下面的剪報/影片,真的講得非常到肉的!



那麼,很難出奶又是怎樣的一回事呢? 其實這也是今天想分享的主題,一個母乳媽媽 (特別是新手) 一定要明白的道理---清奶絕對不是容易的事。老實講,甜魔媽媽對於這點體會深得不得了,因為第一胎餵奶不順,已經很努力去埋身再加用手揸,但Matthew不飽同時自己卻又塞奶塞到乳腺炎,這不是十分的矛盾麼? 來到今胎,餵奶頭半年都尚算順利,但其實胸部也明顯開始揀擇,去到七個月左右,Chloe妹妹越吃越多固體 (可按此參考前文),甜魔媽媽要清奶開始越來越麻煩了。一個又是不太合理的現象是:上午Chloe吃米糊/粥仔後,如果甜魔媽媽單靠揸奶 (用手),頂多有4安左右。但如果在她餐後給她啜幾口,再揸就有7安左右的產量! 更不合理的是,上午在Chloe沒吃奶的情況下只揸了4安,而再隔3-4小時埋身餵飽她後,再揸卻可以有4-5安的盈餘,到底這是怎樣的一回事呢?
 
答案說穿了很簡單,就是甜魔媽媽靠自己做不到清奶效果,又或者這樣說:靠自己刺激不到噴奶反射。噴奶反射是餵奶半年後必須要懂的概念,事緣人體構造奇妙,大概造物主估到此時BB要引入固體食物,母體不能再似初產婦的易谷奶,因此有了能承受那久時間才出奶的能力。因此胸部大部分時間都會是偏軟,直到一旦刺激到噴奶反射,才突然一陣子變硬,奶水自動湧出來,而且次數可以是3-4次或以上。聰明的讀者們可能都估到了,引發這個噴奶反射的,最有效的,就是靠BB的吸啜。當身體遇上噴奶反射,就好似貨倉認到老闆,倉門大開,貨物才能快速送出;不然倉門不開,要出貨還真麻煩... 用另一個例子,就是近日的天氣:明明是想下雨,但就下一陣驟雨又轉晴,以致長期的又悶又焗十分難受,大家都知道,如果雨水肯一次過嘩啦嘩啦落下來,天氣就會轉涼轉爽舒服了。其實母乳也是一模一樣的感受呢,清不到奶的話,隔不久胸部就漲悶了,但在沒有噴奶反射下又只能谷著出一少陣奶,很辛苦的。
    
甜魔媽媽的例子,是轉成FTM後埋身太多,身體/奶庫已經完全認定了Chloe妹妹的小咀才是老闆,舊日的奶泵簡單完全不show它了! 前幾天去迪士尼甜魔媽媽八卦將舊泵找出來,泵了近七分鐘連半安也沒有,撞鬼! 最後還是靠用手揸出4安左右,因為揸奶有點似強搶民女/打劫貨倉,夾硬來總會搶到一些貨,當然效果不能與貨倉見到老闆積極主動出貨相比,但總比貨倉完全不認人好。
  
老人家都有講,既然這樣上午就不要揸奶吧;但除了因為身體會不舒服,另外甜魔媽媽仍想繼續有多餘的奶去給Matthew仔飲,並且開始要為七月底/八月頭的歐洲之行儲奶了。但也是因為很難清奶的問題,甜魔媽媽對於這趟旅行開始十分的擔心,擔心會跌奶 (這個一定會跌... 估計旅行後難以再兼給Matthew飲了,只希望跌完後仍有Chloe妹妹需要的量),更擔心會塞奶,會乳腺炎... @@ 也有想過好不好給Chloe也辦證,然後把這個強力活奶泵也帶去,不過成數不高,始終真心想有段二人世界的時光啊。再算吧。
 
不過特以這篇分享給各位母乳媽媽,希望大家一定要明白:泵量絕不等於奶量,軟奶也不等於沒奶 (至少要去到「阿婆胸」才達標!),要清奶最最最有效肯定是靠BB的咀巴。當然初生BB的吸啜力不好、BB逼近面對初生黃疸、BB出現奶咀混郁、新手媽媽餵奶的頭起得不好等等,會造成很難靠埋身,但這都是有方法去糾正的,雖然花的時間、人力 (有沒有幫手真的很關鍵!) 會相對多很多。歡迎大家留言/電郵給甜魔媽媽討論!
 
最後,甜魔媽媽的Medela Freestyle電泵真的沒用了... 現在考慮是到底乾脆賣掉,還是進行一項甜魔媽媽覺得挺有意義的「租泵行動」? 因為一個電泵真的很貴,有些媽媽可能根本夾不到,要買回去才知道不行,太慘太浪費錢了! 回想自己第一胎時,也很想有「試泵」的機會,但一直沒有結果訓練出揸奶技巧,回想起來雖然這似乎更適合自己,但始終是沒試過不甘心啊,所以今胎再花錢買回來,叫做圓了心願,也慶幸頭幾個月特別在返工日子,這個泵也幫了很大的忙,最高產量是3小時12安士! 關於泵的去向,也歡迎大家留言投票~~~
   
** 想收到兩小兄妹的最新消息,可以like一下Matthew and Chloe fanpage哦~~

14 則留言:

  1. 媽媽真係十分偉大架尤其餵母乳更要加許真係十個叻^0^

    回覆刪除
    回覆
    1. 其實都好感恩今同胎順利左好多, 先可以輕鬆d咋!

      刪除
  2. 你係咪忘記左當初打算做左全職媽媽每星期只試食2-3次?

    haitang

    回覆刪除
    回覆
    1. 梗係冇忘記! 星期一同朋友high tea先講起試食, 我話堅找每個星期2-3晚only, 佢地都好驚訝!

      依家試食次數真係少左, 推 (應該話ignore) 的邀請就好多! 不過一d親子活動, 同埋送上門, 總之唔阻我同小兄妹相處個d, 就可以例外啦~~

      刪除
  3. 終於追完post,我仲以為你又生多件!
    好恐怖,你個食友圈既食物常識非常差!!!O小姐話黑糖含有大量的鐵質,OL小姐話南瓜降血糖!!!你要小心哦,唔好俾人誤導。

    小角

    回覆刪除
    回覆
    1. 唔敢再生啦!! XD
      其實我好鍾意你同海棠黎留言, 雖然串串地, 但真係發自真心同好心! :)
      放心啦, 除左聽talk的營業師同海棠的blog (佢真係好pro), 其他的我都絕不會盡信啦~~ ;)

      刪除
  4. 甜魔媽媽你好, 我係新手媽媽啦。 BB 而家17 日大。 之前BB 啜損左邊乳頭, 所以餵奶好痛, 搞到無發清左邊奶。 之後有之餵完用手揸清。 本來餵奶係一次一邊。 但而家變左2 次左邊, 先一次右邊「 因咁先feel 右谷」 請問咁樣有冇問題??

    Thank you. CC

    回覆刪除
    回覆
    1. 其實BB吸啜方法正確的話, 應該係唔會整損乳頭架! 如果長期唔餵左邊, 我怕妳一邊的產能會大減呢, 或者叫老公去母嬰用品店買個乳頭protector, 可以幫到少少的~~

      刪除
  5. 奶庫認定妹妹才是老闆,真神奇!

    回覆刪除
    回覆
    1. 係丫, 依個貨倉真係好神奇架, 遲d有機會分享更多關於噴奶反射的種種

      刪除
  6. 講個秘密你知,我係海棠妹忠粉。我由佢第一代blog已經睇啦,我估你係第三代。佢第一代blog係講護膚品架,佢父母都係化學人。佢第二代blog係講酒店架,佢係起酒店架。依家係第三代blog,講營養架。

    小角

    回覆刪除
    回覆
    1. 雖然留言有d串 (有d blog友真係頂佢唔順), 但佢寫野真係有料又有point架! 我估我係2-3代中開始睇, 個時佢都有影+寫唔少建築, 當然更吸引我絕對係關於營養, 真係好切身呢, 不知不覺都影響左我飲食習慣好多好多了~~~

      刪除
  7. 甜魔媽媽你果泵會讓出嗎?其實我一直想買電泵但太貴買唔起 :(

    回覆刪除
    回覆
    1. 其實我都未搵到妥善方法處置佢, 如果妳有意要, 不如email我傾啦: gourmet.yan@gmail.com ;)

      刪除