跳至主要內容

遲來的分享 : Yes-Parents 幼兒入學選校面試攻略 講座

個講座媽媽係七月中去聽的, 其實一早想同大家分享, 不過七八月實在太多太多活動+生日飯啦!! 忙下忙下來到9/1先有時間出文, 真係唔好意思~~~ 
 

 

講座由Yes-Parents.com主辦, 唔講唔知原來佢地website都好多野睇架, 有興趣可以去望望~~

http://yes-parents.com

當晚的講座分開兩部分, 首先係由新領域潛能發長中心的總服務統籌講「提升幼兒專注力」, 內容包括下列幾方面:
-- 提升視覺專注 : 每日讀報5-10分鐘, 等車等人時, 留意街道特色
-- 提升聽覺專注 : 每日最少一次聽指令完成任務, 嘗試重複別人的說話, 培養子女探索收音機
-- 提升自控能力 : 用時鐘及手錶加強專注力, 培養子女每星期看相片的興趣
-- 培養日常生活專注力 : 在日常自理, 飲食, 玩具, 遊戲方面著手........

以上內容媽媽覺得係個參考, 但每個小朋友的性格脾氣都唔一樣, 最終點樣去引導小朋友, 其實好需要父母的耐性同智慧~~ 或者因為咁, 講者最後都係用「動腦不動氣」來總括part 1! 
 
而其實無論係當晚參加的父母, 抑或今晚我想分享的重點, 係part 2由黃佩蓮校長主講的「幼兒入學攻略---選校、報名策略及面試貼士」!!
 


黃校長首先講解幼兒園 (N班) 同幼稚園 (K) 的分別, 相信各位媽媽都知N班2歲起, K就3歲 (其實嚴格係2歲8個月) 起就讀, 都係K1, K2, K3咁上; 不過原來幼兒園的服務範圍更包埋暫托、延展、兼收, 即係可以幫大家睇住個BB, 對於部分父母來講非常方便!

選校策略方面, 黃校長建議家長上網搜索 (http://www.chsc.hk/kindergarten), 然後再作實地參觀 (特別係借下洗手間check下衛生), 同時參考其他家長口碑~ 另外都要考慮課程適切 (想學英文? 普通話?), 同埋近在咫尺始終最理想!

她亦講解了報讀幼稚園的流程及預備: 約一年前就開始物色心儀幼稚園, 然後9月開始查詢派發申請表日期 (所以我依篇blog唔再等得, 一定要今日出!!), 而9-10月就係遞交幼稚園申請表高峰期, 之後11月的週六則會係參與面試的高峰期, 至於結果大概一個月會有通知~~ 如成功被取錄, 就交留位費 (其實教育局o係依方面有規定, 不過有部份幼稚園唔理濫收, 但黃校長建議真係鍾意都照俾, 唔好同人嘈!); 不成功的話, 就申請作後補生 (反正每間總有一D父母留了位又最後揀第2間返) 或另選別校, 只要去到6月時有被取錄, 交留位費同時買埋書薄及校服, 小朋友到9月份就可以返學啦!! 
 
黃校長接著講面試程序及流程, 首先到校登記 (早10-15分鐘好啦, 費時BB等得耐會炆) 後, 會入課室/操場, 玩下玩具 / 體能活動 / 睇下圖書 / 聽下故事, 並有面談 (關於生活及飲食習慣 / 興趣等), 最後就等通知 / 註冊~~ 一般本地課程面試會以廣東話為主, 只有非本地課程先會英語為主 (可能係外藉人士), 所以小朋友的中文不能太差!

她亦分享了常見十大面試問題, 首先係家長篇:
1. 為何選擇本校?
2. 對本校之辦學理念知多少?
3. 是否認同本校之辦學理念? 請解釋
4. 平日與孩子有何親子活動?
5. 孩子的主要照顧者是誰?
6. 你對管教子女有何看法?
7. 你覺得你了解自己的孩子嗎? 可以簡單告訴我嗎?
8. 你對你的孩子有何期望?
9. 你心目中理想的幼稚園應該是怎樣的呢?
10. 你覺得幼稚園家長的角色是怎樣的呢?

當然亦有常見十大面試問題---孩子篇:
1. 你叫甚麼名字?
2. 今年幾多歲?
3. 你是男仔還是女仔?
4. 今日有誰陪你來呀?
5. 你家裡有那些人?
6. 平日在家, 誰陪你玩呢? 玩甚麼?
7. 爸爸媽媽有沒有帶你出去玩呢? 去那裡?
8. 你喜歡去那裡玩?
9. 你喜歡吃甚麼? 不喜歡吃甚麼?
10. 你喜歡玩甚麼?

黃校長接著分享校長考慮收生的因素, 包裝學生的能加及表現 (發展、情緒、整潔因素), 家長的態度及表現 (誠懇、合作、有禮為佳), 家庭的效能 (照顧、培育), 以及推薦人因素 (有當然好!)
 
面試失分之常見原因, 則包括遲到; 家長態度挑剔、沒有禮貌、過份照顧孩子; 幼兒語言障礙、不明白指令、發脾氣、過度活躍; 衣著欠整潔....

係咪覺得好正呢?? 由校長來主講真係好具說服力, 仲要黃校長之後更分享了面試預備篇!!

1. 面試前應培養孩子的能力
- 人際智能 -- 社交能力
- 語言智能 -- 表達及理解能力
- 運動智能 -- 大肌肉及小肌肉協調
- 數學認知智能 -- 對比、顏色、數概

2. 面試常見問題
- 顏色配對 : 紅、黃、藍、綠...
- 形狀配對 : 圓形、正方形、三角形...
- 數量概念 : 一一對應、數數...
- 實物名稱 : 動物、人物、水果、衣服、交通工具、身體部位等....
- 對比概念 : 大小、長短...
- 溝通方面 : 理解及表達 (日常生活)
- 社交方面 : 眼神、互動表現
- 體能方面 : 大肌肉、小肌肉、手眼協調...
- 美藝創作 : 大筆畫、蠟筆畫.....

3. 面試前準備
- 家長宜先行了解該幼稚園的背境
- 參觀校舍並諮詢面試的模式
- 模擬面試 (但不要過份操練)
- 預備服飾 (大方、舒適、自然為佳)
- 有足夠的睡眠

黃校長總括, 重點是熟習常用測試玩具及教材、了解學校殷選準則、家長要留意面談說話技巧, 以及家長及孩子面試禮儀及儀容! 最後一個錦囊, 就是保持輕鬆的情緒, 她更藉變魔術來令全場家長驚奇, 並說明 --- 最終小朋友一定會有書讀, 不太要緊張擔心!!
 
特別辛苦打起依篇blog, 好希望可以幫到其他的父母在新一年報學校; 當然希望大家都尊重版權, 唔好就咁copy, 如有需要可以盡量引用啦~~ 
   


同埋我始終係為食媽媽, 順便分享埋講座前由老公介紹, 好好味的打底餐@清湯腩王~~ 



講明先, 依間野環境只係一般, 不過食物實在堅得~~~~



頗甜的蘿蔔湯, 正~~~~



超好味的泰式豬脾飯!! 淨食抑或撈汁都好一流~~~~ 



咖哩牛腩飯又係無得頂, 食到我同妹妹都lam lam脷~~~~  

加埋杯凍奶茶 (少冰了...) 真係大滿足~~~ 

 

** 來到39週, 媽媽真係隨時作動入院生得!! 由於Yahoo Blog係預先寫定set時間出街的, 未必咁快update到, 如想緊貼情況, 請likeMatthew and Chloe fanpage, 以得到最新通知
 
** 真係估唔到Y! Blog要執.... 可能會改去 --> http://gourmetyan.blogspot.hk/, 但一日未肯定前, 同時最好大家Like定Matthew and Chloe, 以保持聯絡呀! 

留言

  1. 謝謝你的分享。
    我正在想如何安排我仔仔(2012年12月出生)的幼兒/稚園。讀不讀N班?幾時報etc,這篇文章可協助我參考資訊。

    回覆刪除
    回覆
    1. 唔駛客氣, 其實我打出來都係當溫故知新, 幫到大家就最好!!

      刪除
  2. thanks! apple黎緊5/10都開始interview了, 開始緊張.

    回覆刪除
  3. 回覆
    1. 冇報N班, 今年直接報K1, 出年9月入學~~

      刪除

發佈留言

此網誌的熱門文章

快樂週五:十週年錫婚之旅預告 + 美國簽證心得分享

Happy Friday,急不及待分享今早美國簽證面試成功的好消息,數個月後的十週年錫婚之旅,就此敲定會去美加啦!不得不說,美國簽證還真是超麻煩又難搞,所以今篇也分享一下個人心得~ 先講講為什麼會想去美加。九週年的歐洲遊無疑十分開心,但再去最快也要2020年,始終去歐洲要計劃太多東西,十週年本來想去輕鬆的陽光海灘遊,其中斐濟是最大的目標。不過斐濟位於南半球,7-8月去會有點冷,未必能下水;所以又想過再去印尼  峇厘島 ;但期待度當然就差一截啦... 後來甜魔媽媽在去年的 Langham x Cordis 聖誕派對  中,幸運獲得 Langham New York 三晚套房住宿 + 雙人早餐 + 雙人Spa + 雙人米芝蓮晚餐,才開始研究這個從未想過會踏足的北美洲。

天佑烏克蘭 Stand with Ukraine

本想如常分享移加點滴,但2022年2月24日正式開啟的俄烏戰事,實在令人揪心!忍不住要在小小空間,記錄一下這一週多的所見所聞及所思所想。 Source: NBC News 甜魔媽媽明白並了解,每個國家、民族,甚至每個個體都有不同立場、政見及想法,但戰爭不同於一般外交手段,中間 必然牽涉殺戮及傷害 ,當中又無可避免會禍及無辜平民及婦孺。所以作為一個有同理心的正常人,我絕對 反對戰爭 ,而俄烏戰事一開始,甜魔媽媽就心痛不己;事實上,網上也到處都流傳著烏克蘭非軍事區被炮轟,百姓面對生離死別的催淚畫面。

久違了的元朗食記-雞地篇:覓食家 + 百份百 + Mr. Chef + Darci by Aldou...

Happy Friday,繼續分享元朗本區食記,但雞地在那裡?其實是指元朗段以南、鳳翔路以東、元朗公路以西、下攸田村以北的地段,由於曾是元朗墟買賣雞鴨等家禽的市場,故有「雞地」之篇,很多街道都以「鳳X街/路」取名!甜魔家正正位處這區,所以常在這帶出沒搵食,下面介紹的餐廳,很多都是吃了十數次,甚至過百次的街坊店了~