跳至主要內容

Matthew仔在淺水灣 + 生日飯@ Pickled Pelican (Yahoo copy版)

前文, 同Jo B及Jo媽告別後, 一家四口就搭港鐵過海會合Icy, 然後一同出發去淺水灣啦!! 
 
  
來淺水灣有幾個原因, 首先除復活假墾丁之旅, 今年Matthew仲未正式過去沙灘, 二來上次Para'Kito的活動來到淺水灣, 覺得風景好靚; 最後又係覺得生完妹妹冇時間陪Matthew, 所以趁仲郁得去左先! 
  

 
幸而好動豬告別Jo B後, 有一段頗安詳的1.5小時午睡, 因為之後又係玩到超盡興呀!!! 
 
 
當日的天氣係真係超晴, 雖然我地已經慢慢拖到5點幾才來到, 但都係超熱呀~~~~
 

 
起初Matthew只在沙灘玩沙, 媽媽慢慢拖佢行近海邊cool down下~~~~
 

 
係咪好涼呀??? 
 

 
此情此景, 令媽媽諗起復活假墾丁之旅的片段丫! 轉眼間Matthew又大個好多喇~~~   

 
天氣太熱, 大肚媽媽真係唔太頂得住, 浸了一陣就忍唔住返去樹蔭底下的沙灘席下休息, 留返爸爸同Matthew玩+影相~~~ 又係辛苦哂爸B啦!! 
 

  
唔知係因為天氣太熱, 定始終訓醒起身冇耐, Matthew仔的笑容唔多呢, 好多都皺眉的!
 

 
突然hyper!!!  (按: 淺水灣真係特別多蚊.... 一定要帶蚊帶o係手!! )  

 
Icy都來同好動豬玩, 而且一玩就幾乎濕哂身~~~~~
 

 
返上岸繼續玩沙~~~~~
 

 
哎呀, 同細個時去馬灣 (請參見引用) 一樣, 好快就玩到成臉都係沙~~~~ 
 

 
終於面露笑容啦~~~~~ 
 

 
又突然好hyper啦!!!! 
 

 
哎呀呀, 仲撥到自己成臉都係沙~~~~~~   

 
 

 
此情此景, 又令媽媽諗起去年8月在馬灣, 當時BB又係玩到成面沙!! 寫blog就係依樣好, 可以link back好多珍貴的memories呀~~~ 
  

 
雖然搽左防曬, 但天氣實在太熱, 再玩都擔心BB中暑, 都係時間去沖身然後去食飯!
 
 
沖完身搭的士來到赤柱食Pickled Pelican, 本來佢環境好唔錯, 但最近竟然裝修, 大打折扣! 
  

 
算啦, 我地就坐2/F, 感覺都冇咁受影響了~~~~
 

 
除了淺水灣, 赤柱都係第一次來, 好奇周圍望的Matthew仔~~~  

 
其實是晚本來仲有Icy男友, 可惜臨時因事缺席, 不過算啦! 咁樣的組合都一樣開心~~~ 
   
 
 
媽媽在淺水灣時一早應承了要買Ice-cream俾BB食, 所以來到即點了Banana Split ($62)! 
 
成品賣相唔算特別, 但所用香蕉熟度剛好, 不會太軟爛, 最緊要係三色雪糕原來係movenpick, 無論係Swiss Chocolate定Vanilla都超級好味, 酸酸地的strawberry都唔錯, 好正呀 
 

 
不如睇下Matthew仔示範用上頂級雪糕的banana split有幾好味啦!!!  



http://www.youtube.com/watch?v=ARHijj9VUBU

食完粥仔同banana split, 開心好動豬又o係餐廳隨節拍起舞.... 最搞笑係要求爸媽都一齊follow!
 
http://www.youtube.com/watch?v=Z6mT9ScAXdM 


 
繼續講(飲)食, 除了媽媽決定飲水, 大家先於飲品menu選點心水飲品, 不過Icy依杯Fruit Yogurt ($70) 要用spoon食的, 嚴格來講算係甜品更多喎!  而且口味好天然, 比較淡口~~ 


老公點了Passion fruit口味的Fruit Shake ($70), 係由雪糕blend埋自選口味生果, 味道酸甜又清新, 依個唔錯架 



依度最出名係French Onion Soup ($68), 成品一上檯已經不得了, 滿佈芝士好正呀 



食落D芝士真係多同濃到呢... 同埋超鍾意依款gruyere帶輕微的酒味, 超好食; 個湯本身又十級足料, 洋蔥味極清甜, 整個湯好夠味但一點不咸, 水準比起早前Lucques Tavern更高, 超推介! 
 

另一款頭盤點了侍者推介的Nachos Platter - warm nachos ($95), 組合包括芝士辣牛肉、蕃茄醬、酸忌廉及媽媽至愛的牛油果醬, 非常的大堆頭, 味道都唔錯架!! 



為食Matthew都搶了唔少Nachos來吃~~~~



仲想學大人咁點埋醬添呀, 真係好鬼識食~~~~ 



食完Nachos仲拎左個蕃茄醬的兜仔, 玩左好耐好興奮, 正一hyper BB!! 
 
http://www.youtube.com/watch?v=sRJLKdOIhco

 
食完頭盤已經半飽, 但主菜size仲勁, 首先有Ultimate USA Beef Burger ($148), 好大個包呀!!! 



加了甜洋蔥、煙肉、芝士、蕃茄、生菜的巨大漢堡, 實在真係太足料啦, 我同Icy只可以每人食到1/4, 另外一半交俾老公處置, 食完佢都飽到傻! 仲有大量粗薯雖然好味, 都無能為力~~ 


 早知大家食力不強, 另外就只點了Fish & Chips ($148), 點估到都有三大條巨型sole fillet上檯丫 
 


其實佢的魚柳真係炸得好好味, 十級香脆又嫩滑多汁, 點上他他醬真係非常滋味, 結果一人一大條KO了~~  另外香脆的長薯條會跟埋醋一齊上檯, 係好傳統的英式食法, 不過真係食唔哂~~ 


又原來, Matthew仔除了檸檬, 都好鍾意呷醋, 是晚都食了唔少醋呢~~~ 

  
因媽媽係Cafe Deco Group VIP, 最後仲有個免費生日蛋糕, 係一磅裝的cheesecake!! 
  

  
Matthew仔, 咁大個蛋糕, 媽媽靠你啦~~~~ 
 

 
到底依個芝士蛋糕好唔好味? 可以話俾大家知, 佢芝士味夠濃, 味道係good, 不過質感呢就非常之實淨, 換言之就係好漏!! 
 

 
Matthew「嘩, 真係好實呀, 妳點切開佢架??」 
 


是晚太飽啦!! 結果蛋糕打包了一半回屋企, 慢慢再食; 而有生日優惠關係, 依餐埋單好抵, 係超級開心滿足的一日!! 又, 接著幾篇都會係媽媽的生日飯, 最後依個月真係肚滿腸肥呀~~! 

留言

此網誌的熱門文章

快樂週五:十週年錫婚之旅預告 + 美國簽證心得分享

Happy Friday,急不及待分享今早美國簽證面試成功的好消息,數個月後的十週年錫婚之旅,就此敲定會去美加啦!不得不說,美國簽證還真是超麻煩又難搞,所以今篇也分享一下個人心得~ 先講講為什麼會想去美加。九週年的歐洲遊無疑十分開心,但再去最快也要2020年,始終去歐洲要計劃太多東西,十週年本來想去輕鬆的陽光海灘遊,其中斐濟是最大的目標。不過斐濟位於南半球,7-8月去會有點冷,未必能下水;所以又想過再去印尼  峇厘島 ;但期待度當然就差一截啦... 後來甜魔媽媽在去年的 Langham x Cordis 聖誕派對  中,幸運獲得 Langham New York 三晚套房住宿 + 雙人早餐 + 雙人Spa + 雙人米芝蓮晚餐,才開始研究這個從未想過會踏足的北美洲。

天佑烏克蘭 Stand with Ukraine

本想如常分享移加點滴,但2022年2月24日正式開啟的俄烏戰事,實在令人揪心!忍不住要在小小空間,記錄一下這一週多的所見所聞及所思所想。 Source: NBC News 甜魔媽媽明白並了解,每個國家、民族,甚至每個個體都有不同立場、政見及想法,但戰爭不同於一般外交手段,中間 必然牽涉殺戮及傷害 ,當中又無可避免會禍及無辜平民及婦孺。所以作為一個有同理心的正常人,我絕對 反對戰爭 ,而俄烏戰事一開始,甜魔媽媽就心痛不己;事實上,網上也到處都流傳著烏克蘭非軍事區被炮轟,百姓面對生離死別的催淚畫面。

久違了的元朗食記-雞地篇:覓食家 + 百份百 + Mr. Chef + Darci by Aldou...

Happy Friday,繼續分享元朗本區食記,但雞地在那裡?其實是指元朗段以南、鳳翔路以東、元朗公路以西、下攸田村以北的地段,由於曾是元朗墟買賣雞鴨等家禽的市場,故有「雞地」之篇,很多街道都以「鳳X街/路」取名!甜魔家正正位處這區,所以常在這帶出沒搵食,下面介紹的餐廳,很多都是吃了十數次,甚至過百次的街坊店了~