跳至主要內容

火玲瓏 ~ 樸實的裝潢、紮實的味道 (Yahoo copy版)

又繼續清返上星期放假前的食記, 其實除了Chocolate Thunder、心太軟、壽包等甜品, 媽媽仲有一個產前心願, 就係同一班辣魔去食餐火辣川菜呀!! 
 
 
多謝劉總安排, 依個心願終於上週二達成!! 地點係青衣美景花園新開的火玲瓏, 小店無雖華麗裝修, 但就有重慶師傅坐鎮, 味道紮實; 地點雖唔近地鐵, 但媽媽收工後由葵芳搭88C去好快呢 


 
小店有提供可樂、王老吉等解辣飲品, 然而Thomas是晚心情大好, 豪請大家勁飲啤酒! 事實上, 小店唔介意食客自由出入, 自購酒水, 都係一大便利位, 媽媽諗過買雪糕黎食添架, 不過最後太飽了 



講返飲品, 啤酒當然無我份, 不過就試了店內的野生老鷹茶 ($38/紮), 原來係四川一款本土茶, 茶色橘紅帶點果香, 非常清新解辣, 好正喎, 我地飲完意猶未盡, 後來追加了一紮呢~~ 
 


前菜的手拍青瓜 ($12 x2) 好得, 其實我幾怕青瓜的草青味, 但依度出品清新爽脆, 略帶一點鮮甜味, 大家都一件接一件的吃個不停!  除了原味, 也有加辣的版本, 但個人認為原味出色D~  


麻辣豬耳 ($18 x2) 又係好得, 講真豬耳本來又係一款我唔鍾意的食材, 但依個調味太正喇, 滋味咸鮮微辣, 吃進口後麻香才慢慢滲出, 加上豬耳的爽脆口感, 又係令人食個不停呢~~ 
 


小店的晚市主打火鍋, 是晚我地亦試了兩款, 先是不辣的清湯牛腩鍋 ($58), 大大鍋連上為數不少的蘿蔔以及靚牛腩, 非常抵食, 而且D牛腩質素幾得架! 而依鍋湯, 就成了CEO及jj的主食~~ 
 




至於其他辣魔 (包括我, hehe), 就主攻重慶麻辣湯底 ($58) 啦!! 它比起傳統四川湯底多了紅油, 但就減了花椒份量, 更加適合大家的口味, 無論是淥牛肉抑或煮苕粉, 滋味都好一流!  


很多人吃火鍋喜歡來味碗, 可對於我其實不太需要, 特別是麻辣鍋本身已經很夠味! 



對了, 火玲瓏日間是主打米線的 (晚市也有供應, 當晚也見不少街坊幫襯), 也要了一兜來淥火鍋~~



媽媽quota不多 (孕期最後真的很易頂著胃啦... 同埋妹妹太重磅唔食咁多澱粉質啦!) 只試了一口, 但覺都幾爽滑可口喎! 

孕期最後要大量吸收鐵質及蛋白質, 媽媽還是留肚勁食手切肥牛片 ($138 x2)吧!! 這肥牛除了量足價錢抵, 仲要肉味非常濃厚, 丁點雪味都無, 放在麻辣湯中更能帶出牛香與惹味, 超正! 
 

牛柏葉 ($42 x2) 雖然用的不是黑柏葉, 但也非常爽脆可口, 又係好襯麻辣湯底!! 



四寶丸 ($42 x4), 分別有牛丸、貢丸、芝心丸及海膽丸, 當中媽媽至愛煮完會變融的流心芝心丸, 好正; 其他的丸類亦大受食友歡迎, 當晚我們前後吃了4碟之多呢!! 



四川窩荀 ($22 x2), 吃川式火鍋又怎能少得窩荀? 清爽美味的它, 可是老公的至愛之一來的!! 
 


 ($32 x2), 睇落好新鮮好靚, 不過媽媽不嬲唔多食豬膶呢, 暴殄天物了!! 


娃娃菜 ($22 x2), 蔬菜不妨多吃, 可菜葉吸收了紅油及花椒真的不講得少, 這味還是放清湯中淥好了!
 


四川苕 ($18 x3), 除了牛肉, 當晚另一令媽媽吃個不停的項目就是苕粉, 因為成品實在滑溜又彈牙, 在麻辣湯中煮完一輪, 實在是香麻美味不得了, 大家要勁食三碗才夠皮呢!! 

 
特級桂花蚌 ($88 x2), 成品十分新鮮爽脆, 在放清湯中固然能保持鮮味, 但在辣湯中煮又有另有一番辣鮮風味, 都好吃呢~~~ 



鯪魚滑 ($42 x2) 媽媽又係麻麻食鯪魚的, 不過這裡的出品算是鮮滑可口, 當晚也幫襯了兩轉~~


 
雖然主打火鍋, 但小店也有出品好些四川小菜, 包括這特色雞煲 ($128), 紅彤彤的非常吸引! 
 


其實雞件初期並不會很辣, 香料味適中, 肉質又嫩, 很適合吃辣初哥享用, CEO及jj也趁機大快朵頤! 其後雞件越煮越辣, 越煮越入味, 就要留給資深辣魔如Oli、老公之輩了~~ 



很飽了, 但總得一試水煮魚 ($68 x2), 新鮮煮起的水煮魚實在太香口、太滑嫩、也太美味了, 雖然最後才上檯, 大家仍是吃到停不了口, 老公尤其喜歡不得了, 以此價位實在很推介!! 


 
沒有任何折扣下, 這12人晚餐埋單除開只需人均$122, 實在是太抵食又滿足了!!  喜歡吃辣的朋友如不嫌遠, 實在推介來幫襯支持一下呢~~ 又, 今餐後再會食友應該是坐月後... 期待著! 

** 隨著產假開始 + 妹妹落緊盆骨媽媽隨時作動入院生得想緊貼情況, likeMatthew and Chloepage!
 

留言

此網誌的熱門文章

快樂週五:十週年錫婚之旅預告 + 美國簽證心得分享

Happy Friday,急不及待分享今早美國簽證面試成功的好消息,數個月後的十週年錫婚之旅,就此敲定會去美加啦!不得不說,美國簽證還真是超麻煩又難搞,所以今篇也分享一下個人心得~ 先講講為什麼會想去美加。九週年的歐洲遊無疑十分開心,但再去最快也要2020年,始終去歐洲要計劃太多東西,十週年本來想去輕鬆的陽光海灘遊,其中斐濟是最大的目標。不過斐濟位於南半球,7-8月去會有點冷,未必能下水;所以又想過再去印尼  峇厘島 ;但期待度當然就差一截啦... 後來甜魔媽媽在去年的 Langham x Cordis 聖誕派對  中,幸運獲得 Langham New York 三晚套房住宿 + 雙人早餐 + 雙人Spa + 雙人米芝蓮晚餐,才開始研究這個從未想過會踏足的北美洲。

天佑烏克蘭 Stand with Ukraine

本想如常分享移加點滴,但2022年2月24日正式開啟的俄烏戰事,實在令人揪心!忍不住要在小小空間,記錄一下這一週多的所見所聞及所思所想。 Source: NBC News 甜魔媽媽明白並了解,每個國家、民族,甚至每個個體都有不同立場、政見及想法,但戰爭不同於一般外交手段,中間 必然牽涉殺戮及傷害 ,當中又無可避免會禍及無辜平民及婦孺。所以作為一個有同理心的正常人,我絕對 反對戰爭 ,而俄烏戰事一開始,甜魔媽媽就心痛不己;事實上,網上也到處都流傳著烏克蘭非軍事區被炮轟,百姓面對生離死別的催淚畫面。

久違了的元朗食記-雞地篇:覓食家 + 百份百 + Mr. Chef + Darci by Aldou...

Happy Friday,繼續分享元朗本區食記,但雞地在那裡?其實是指元朗段以南、鳳翔路以東、元朗公路以西、下攸田村以北的地段,由於曾是元朗墟買賣雞鴨等家禽的市場,故有「雞地」之篇,很多街道都以「鳳X街/路」取名!甜魔家正正位處這區,所以常在這帶出沒搵食,下面介紹的餐廳,很多都是吃了十數次,甚至過百次的街坊店了~